محکمہ زراعت کاشتکاروں کوموسم گرما کی سبزیات کی ہفتہ میں 2 بارپیسٹ سکاؤٹنگ کی ہدایت

پیر 19 مئی 2025 14:06

فیصل آباد (اُردو پوائنٹ اخبارتازہ ترین - اے پی پی۔ 19 مئی2025ء) کاشتکاروں کوگرمی کی شدت میں بتدریج اضافہ کے باعث موسم گرما کی سبزیات کی صحتمند فصل حاصل کرنے کیلئے 6 سے 10دن کے وقفہ سے آبپاشی اور جڑی بوٹیوں کی تلفی کی ہدایت کی گئی ہے ۔۔ڈپٹی ڈائریکٹر محکمہ زراعت توسیع عدیل احمدنے کہ کاشتکار کریلے اور موسم گرما کی دیگر سبزیات سبز مر چ،گھیا توری، گھیا کدو وغیرہ سے جڑی بوٹیوں کی فوری تلفی کیلئے اقدامات کریں اور آخری گوڈی کے وقت پودوں کیساتھ مٹی چڑھائی جائے اور موسم گرما کی سبزیات کی صحت مند فصل حاصل کرنے کیلئے 6 سے 10دن کے وقفہ سے آبپاشی کو بھی یقینی بنایا جائے جبکہ ہفتہ میں 2مرتبہ سبزیوں کی پیسٹ سکاؤٹنگ کے بھی انتہائی مفید نتائج حاصل ہو سکتے ہیں ۔

انہوں کہا کہ اروی کی فصل میں جڑی بوٹیاں تیزی سے پرورش پاتی ہیں اسلئے جڑی بوٹیوں کی بروقت گوڈی کر کے انہیں فصل سے نکال باہر کرنا چاہئے تاکہ وہ کھاد، آبپاشی اور فصل کی پیداوار میں نقصان کا باعث نہ بن سکیں۔

(جاری ہے)

انہوں نے کہا کہ چونکہ پودوں کی بغل میں شگوفے جلد پھوٹ پڑتے ہیں اسلئے گوڈی کے دوران ان کو توڑ دینا چاہئے ورنہ کچالو زیادہ اور اروی کم بنے گی جس سے کاشتکاروں کو مالی نقصان کا سامنا کرنا پڑسکتا ہے۔

انہوں نے کہا کہ بہتر پیداوار کے حصول کیلئے جب پودے 30 سے 50 سینٹی میٹر اونچے ہوجائیں تو کھیت کی زرخیزی کو مدنظر رکھتے ہوئے فصل کو ایک سے ڈیڑھ بوری امونیم نائٹریٹ فی ایکڑ ڈالنی چاہئے جس سے اروی کی بمپر کراپ حاصل ہوسکتی ہے۔انہوں نے کاشتکاروں کے ساتھ ساتھ عوام الناس کو بھی سفارش کی کہ وہ گھریلو پیمانے پر کچن گارڈننگ پروگرام کے تحت زیادہ سے زیادہ سبزیاں اگانے کیلئے اقدامات کریں تاکہ سبزیوں کی تازہ اور صحت مند پیداوار حاصل ہو سکے۔