سیالکوٹ،کاشتکاروں کو دھان کی فی ایکڑ زیادہ پیداوار کےلئے منظور شدہ اقسام کا بیج استعمال کرنے کی ہدایت

سیالکوٹ (اُردو پوائنٹ اخبارتازہ ترین - اے پی پی۔ 20 مئی2025ء) زراعت آفیسر مرکز کینٹ عمار عبداللہ نے کاشتکاروں کو دھان کی فی ایکڑ زیادہ پیداوار کےلئے منظور شدہ اقسام کا بیج استعمال کرنے کی ہدایت کی ہے ۔محکمہ زراعت سیالکوٹ نے دھان کے کاشتکاروں کو کہا ہے کہ ہو دھان کی فی ایکڑ زیادہ پیداوار کےلئے منظور شدہ اقسام کا بیج استعمال کریں اورترقی دادہ اور موٹی اقسام کے ایس282 ،نیاب اری9 ،ایس آر6 ،کے ایس کے133 ،کے ایس کے434 اور نیاب2013اورنبجی کی کاشت20 مئی تا7 جون جبکہ باسمتی اقسام پی کے2021 ،ایرو میٹک نبجی باسمتی2020 ،سپرگولڈ،سپر باسمتی2019 ،سپر باسمتی،باسمتی515 ،چناب باسمتی،پنجاب باسمتی،پی کے1121 ایرومیٹک،نیاب باسمتی2016 اورنور باسمتی کی کاشت7 تا25 جون جبکہ شاہین باسمتی کی کاشت15 تا30 جون تک کریں ۔

(جاری ہے)

زراعت آفیسر مرکز کینٹ عمار عبداللہ نے اے پی پی کو بتایاکہ کاشتکار دھان کی ان منظور شدہ اقسام کے علاوہ ممنوعہ اقسام ہر گز کاشت نہ کریں۔چاول کی اچھی پیداوار کےلئے کھیتوں میں پنیری منتقل کرنے سے پہلے 10سے 15 دن تک پانی کھڑا رکھیں اور پھر پانی کی کمی کی صورتحال کے تناظرمیں کھیت میں 7دن تک پانی کھڑا کیاجائےتاہم پانی کی شدید کمی کی صورت میں تین دن تک پانی کھڑا رکھیں اور ہل وسہاگہ دیں۔

کھیت کواچھی طرح ہموار کریں اور کھیت تیار کر کے جلد از جلد پنیری منتقل کریں۔کدو کے طریقہ سے تیار کی ہوئی پنیری 25سے30دن میں جبکہ خشک طریقہ سے کاشت کی ہوئی پنیری 35سے40دن میں منتقلی کے لیے تیار ہوجاتی ہے،اگر منتقلی کے وقت پنیری کی عمر 25دن سے کم ہوتوپودے نازک ہونے کی وجہ سے گرمی برداشت نہیں کرسکتے اور مرجاتے ہیں اگر پنیری40 دن سے زیادہ عمر کی ہو تواس کی شاخیں کم بنیں گی۔

پنیری اکھاڑنے سے ایک دو روز قبل پانی دے دیں تاکہ زمین نرم ہو جائے اور اکھاڑتے وقت پودا نہ ٹوٹے۔ لاب کی منتقلی ڈیڑھ انچ گہرے پانی میں کرنی چاہیے۔ پہلے ہفتے میں پانی کی گہرائی ڈیڑھ انچ رکھیں پھر آہستہ آہستہ تین انچ کر دیں لیکن اس سے زیادہ نہ کریں ورنہ پودے کم شاخیں نکالیں گے اور پیداوار کم ہو جائے گی۔ دو دو پودے فی سوراخ9انچ کے فاصلہ پر اکٹھے لگائیں تاکہ بہترین پیداوار کا حصول ممکن ہو سکے۔