آئرش کرکٹر پال اسٹرلنگ نے آئرلینڈ کیلئے نئی تاریخ رقم کر دی

پال اسٹرلنگ آئرلینڈکی جانب سے انٹرنیشنل کرکٹ میں 10 ہزار رنز اسکور کرنے والے پہلے بیٹر بن گئے

جمعرات 22 مئی 2025 15:53

ڈبلن (اُردو پوائنٹ اخبارتازہ ترین - این این آئی۔ 22 مئی2025ء)آئرش کرکٹر پال اسٹرلنگ نے آئرلینڈ کیلئے نئی تاریخ رقم کر دی۔بدھ کو آئرلینڈ اور ویسٹ انڈیز کے درمیان 3 ون ڈے میچز کی سیریز کا پہلا میچ ڈبلن میں کھیلا گیا۔پہلے ون ڈے میں میزبان آئرلینڈ نے ویسٹ انڈیز کو آؤٹ کلاس کرتے ہوئے 124 سے شکست دے کر سیریز میں ایک صفر کی برتری حاصل کی۔آئرلینڈ نے پہلے بیٹنگ کرتے ہوئے مقررہ 50 اوورز میں 303 رنز اسکور کیے۔

(جاری ہے)

اینڈریو بالبرنی نے 112، ہیری ٹیکٹر نے 56 اور کپتان پال اسٹرلنگ نے 54 رنز اسکور کیے۔304 رنز کے ہدف کے جواب میں مہمان ویسٹ انڈیز ٹیم 35 ویں اوور میں 179 رنز پر ڈھیر ہوگئی۔اس میچ میں آئرش کپتان پال اسٹرلنگ نے آئر لینڈ کے لیے نئی تاریخ رقم کی۔ پال اسٹرلنگ آئرلینڈکی جانب سے انٹرنیشنل کرکٹ میں 10 ہزار رنز اسکور کرنے والے پہلے بیٹر بن گئے۔دائیں ہاتھ کے بیٹر نے آئرلینڈ کے لیے ٹی ٹوئنٹی انٹرنیشنلز میں 3656، ٹیسٹ میں 382 اور ون ڈے میں 5979 رنز اسکور کیے ہیں جو مجموعی طور پر 10 ہزار 17 رنز بنتے ہیں۔