امریکی کورئیر کمپنی کا طیارہ خطرناک حادثے سے بچ گیا

طیارے کے دونوں انجنوں سے پرندے ٹکرانے کے باوجود طیارہ بحفاظت لینڈ کر گیا

جمعہ 23 مئی 2025 13:46

واشنگٹن (اُردو پوائنٹ اخبارتازہ ترین - این این آئی۔ 23 مئی2025ء)امریکی کورئیر کمپنی کا طیارے خطرناک حادثے سے بچ گیا، پائلٹ نے کمال مہارت کے ساتھ طیارے کو لینڈ کروالیا۔میڈیارپورٹس کے مطابق امریکا کے نیو یارک ایئر پورٹ کے قریب پیش آنے والے واقعے میں طیارے کے دونوں انجنوں سے پرندے ٹکرانے کے باوجود طیارہ بحفاظت لینڈ کر گیا۔ایک معروف کوریئر کمپنی کے طیارہ بوئنگ 767 ہنگامی لینڈنگ کرنا پڑی، نیشنل ٹرانسپورٹ سیفٹی بورڈ کی رپورٹ بتاتی ہے کہ طیارے کے دونوں انجنوں سے پرندے ٹکراگئے تھے۔

رپورٹ میں بتایا گیا ہے کہ پرواز کے دوران جہاز کے فرسٹ آفیسر نے 5 سو فٹ کی بلندی پر 3 سفید پرندے دیکھے اور فوری چلایا، جس پر جہاز کے کپتان نے دھماکے کی آواز سنی اور جہاز نے جھٹکے کھائے، جہاز کا نظام آگ لگنے کا کاشن دینے لگا، اور ایئر ٹریفک کنٹرول نے دائیں انجن میں آگ لگی ہوئی دیکھی، اس دوران دونوں پائلٹ نے یہ انجن بند کر کے دوبارہ اسٹارٹ کرنے کی کوشش کی تاکہ ایئر پورٹ پر لینڈ کر جائیں۔

(جاری ہے)

خطرناک صورتحال کے باجود جہاز کا عملہ جہاز کو ایئر پورٹ پر اتارنے میں کامیاب ہوگیا، جہاز میں سوار دونوں پائلٹ اور ایک مسافر کو کسی قسم کی کوئی چوٹ نہیں لگی۔تاہم یہ پتہ چلا کے جہاز کے دونوں انجنوں میں پرندے پھنس گئے تھے، جس کی وجہ سے دائیں انجن میں آگ بھی لگ گئی تھی۔2024 میں نیو ارک ایئر پورٹ پر فضا میں جہازوں سے پرندے ٹکرانے کے 137 واقعات رپورٹ ہوئے۔