ڈسٹرکٹ گولڈ سٹار کرکٹ ایسوسی ایشن سرگودھا کے زیر اہتمام تقریب کا انعقاد

جمعرات 29 مئی 2025 16:50

سرگودھا (اُردو پوائنٹ اخبارتازہ ترین - اے پی پی۔ 29 مئی2025ء) ڈسٹرکٹ گولڈ سٹار کرکٹ ایسوسی ایشن سرگودھا کے زیر اہتمام شہدائے اے پی ایس ماڈل ہائی سکول میں کھلاڑیوں میں کٹس تقسیم کرنے کی تقریب کا انعقاد کیا گیا۔

(جاری ہے)

اس موقع پر صدر ڈسٹرکٹ گولڈ سٹا ر ایسوسی ایشن عتیق الرحمان کمبوہ نے خطاب کرتے ہوئے کہا کہ کھیلوں کے فروغ کے لیے سکول،کالج کی سطح پر سپورٹس کے مقابلہ جات منعقد کروانا خوش آئند ہے جس سے طلباکو صحت مند جسم کے ساتھ صحت مند دماغ بھی ملتا ہے، اس سلسلہ میں شہدائے اے پی ایس ماڈل ہائی سکول کی انتظامیہ کا بھرپور تعاون اور کاوشیں لائق تحسین ہیں۔

انہوں نے کہا کہ کھیلوں کے مقابلہ جات سے جہاں بچوں کو تفریح کا موقع میسر آتا ہے وہیں پریہ بچے سپورٹس کے اندر اپنی صلاحیتوں میں نکھار پیدا کر سکتے ہیں اور اعلی سطح پر منعقد ہونے والے مقابلہ جات میں بہترین کارکردگی دکھا سکیں گے۔ اس موقع پر بچوں میں کٹس تقسیم کرنے کے ساتھ ساتھ ڈسٹرکٹ گولڈ سٹار کرکٹ ایسوسی ایشن کی جانب سے پرنسپل احتشام الحق ہمدانی اور وائس پرنسپل شہباز عاشق کو خصوصی شیلڈ بھی دی گئی۔