علیزے شاہ کی عید الاضحی پر جانوروں کی تصاویر و ویڈیوز شیئر کرتے ہوئے احتیاط برتنے کی اپیل

کراچی (اُردو پوائنٹ اخبارتازہ ترین - این این آئی۔ 29 مئی2025ء)اداکارہ علیزے شاہ نے عید الاضحی پر جانوروں کی تصاویر و ویڈیوز شیئر کرتے ہوئے احتیاط برتنے کی اپیل کردی۔انسٹا گرام پر پوسٹ کرتے ہوئے علیزے شاہ نے لکھا کہ چونکہ عید الاضحی آ رہی ہے اس لئے میں نے سوچا کہ جو بات کافی عرصے سے میرے دل میں ہے عقائد اور روایات کے احترام کیلئے مجھے اس کا اظہار کرنا چاہیے۔

انہوں نے یہ واضح کرتے ہوئے کہ یہ کوئی تنقید نہیں بلکہ نرم دل سے نکلی آواز ہے جو ایک مختلف نقطہ نظر رکھتی ہے کہ بلاشبہ قربانی ایک سنت ہے، ایک خوبصورت روایت ہے جس کی بنیاد حضرت ابراہیم علیہ السلام کی اللہ کی رضا کے آگے سر تسلیم خم کرنے سے جڑی ہے لیکن اسلامی نقطہ نظر سے یہ بات بھی درست ہے کہ یہ ہر ایک پر فرض نہیں ہے۔

(جاری ہے)

بہت سے لوگوں کے لیے زندگی میں ایک بار قربانی کرنا کافی ہوتا ہے وہ بھی اگر وہ مالی استطاعت رکھتے ہوں تو، اس کے باوجود کبھی کبھی ایسا محسوس ہوتا ہے کہ یہ مقدس عمل کسی بالکل الگ چیز میں تبدیل ہوگیا ہے۔

علیزے نے لکھا کہ ہر سال میں سڑکوں پر بہت سا خون اور جانوروں کی آنکھوں میں خوف اور درد دیکھتی ہوں، ان کے رونے کی آوازیں میرا دل توڑ دیتی ہیں، وہ بول نہیں سکتے لیکن جانور محسوس کرتے ہیں، وہ ہماری طرح اپنے قریبی سے جڑے ہوتے ہیں، انہیں بھی اسی محبت کرنے والے خدا نے تخلیق کیا ہے جس نے ہمیں بنایا اور سوشل میڈیا پر شیئر کی جانے والی تصویروں، لطیفوں اور میمز کے ساتھ عوامی طور پر انہیں اتنی تکلیف میں دیکھنا مجھے ذاتی طور پر برداشت کرنا بہت مشکل لگتا ہے۔

اداکارہ نے لکھا کہ میں جانتی ہوں نیت اہمیت رکھتی ہے اور بہت سے لوگ قربانی نہایت خلوص اور عقیدت کے ساتھ کرتے ہیں، یہ پوسٹ اس چیز کے خلاف نہیں ہے، بس نرمی سے ایک گزارش ہے کہ کیا ہم اس عید پر قربانی کے جانوروں کی تعداد اور یہ کہ وہ کتنے بڑے ہیں، اس پر توجہ دینے کے بجائے ہمدردی اور عاجزی کے جذبے کو فروغ دے سکتے ہیں ۔انہوں نے درخواست کی کہ مہربانی کر کے آن لائن شیئر کردہ تصاویر اور ویڈیوز کے حوالے سے احتیاط برتیں کیونکہ ہم میں سے کچھ افراد اس سے بہت متاثر ہوتے ہیں، اسلام انسان اور جانوروں کے ساتھ احترام اور رحم دلی کا درس دیتا ہے اور یہی ہمارے نبیؐ کی اصل سنت ہے۔

انہوں نے کہا کہ یہ میرا ذاتی نقطہ نظر ہے، آپ اس سے اختلاف کرسکتے ہیں آپ کو اس کا حق ہے، میں تمام خیالات کا احترام کرتی ہوں لیکن مجھے یہ کہنا ہی تھا کیونکہ خاموشی میرے دل پر بوجھ بنی ہوئی تھی۔