نیویارک یونیورسٹی ابوظہبی کے سائنسدانوں کی نئی ایجاد، کاغذ پر مبنی ٹیسٹ سے 10 منٹ میں کووڈ-19 کی تشخیص ممکن

پیر 2 جون 2025 15:22

ابوظہبی (اُردو پوائنٹ اخبارتازہ ترین - اے پی پی۔ 02 جون2025ء) نیویارک یونیورسٹی ابوظہبی (این وائے یو اے ڈی ) کے سائنسدانوں کی ایک ٹیم نے ایک خاص کاغذ پر مبنی تشخیصی آلہ تیار کر لیا ہے، جو بغیر کسی لیبارٹری آلات یا ماہر عملے کے، کووڈ-19 اور دیگر متعدی امراض کی تشخیص صرف دس منٹ میں کر سکتا ہے۔امارات نیوز ایجنسی وام کے مطابق یہ آلہ، جسے 'ریڈیللی کمپارٹمنٹلائزڈ پیپر چپ (آرسی پی -چپ) کا نام دیا گیا ہے، ایڈوانسڈ مائیکروفلوئڈکس اینڈ مائیکرو ڈیوائسز لیبارٹری (ایم لیب) میں تیار کیا گیا۔

یہ نظام متعدی امراض کی فوری، سستی اور قابلِ نقل جانچ کے لیے ایک مؤثر حل فراہم کرتا ہے۔اس آلہ کی خاص بات یہ ہے کہ یہ سیال کے ایک قطرے کے ذریعے وائرس کے جینیاتی مواد کے نہایت معمولی ذرات کی شناخت کر سکتا ہے، جس کے بعد ایک واضح رنگ کی تبدیلی کے ذریعے نتیجہ ظاہر ہوتا ہے۔

(جاری ہے)

اس کی کارکردگی کے لیے نہ تو بجلی درکار ہے اور نہ ہی کوئی پیچیدہ مشینری،صرف تقریباً 65 ڈگری سیلسیئس کی معمولی حرارت (گرم پانی کے درجہ حرارت کے برابر) ہی کافی ہوتی ہے۔

یہ تحقیق سنگل لیئر ریڈیللی کمپارٹمنٹلائزڈ پیپر چپ (آرسی پی -چپ) فار ریپڈ آئیزو تھرمل ملٹی پلیکسیڈ ڈٹیکشن آف سارس کووڈ 2 جین ٹارگٹس" کے عنوان سے ایک سائنسی مقالے میں شائع ہوئی ہے، جو جرنل 'ایڈوانسڈ سینسر ریسرچ' میں شائع ہوا۔ اس تحقیق میں اس آلہ کی تیاری اور جانچ کی تفصیلات بیان کی گئی ہیں، جو کہ کم وسائل والے علاقوں میں متعدی بیماریوں کی تیز رفتار تشخیص کے لیے ایک انقلابی پلیٹ فارم کے طور پر کام کرے گا۔