عید قربان پرصوبہ بھر میں امن وامان اور سیکورٹی کے تمام ممکنہ اقدامات کو یقینی بنایا جائیگا، صوبائی وزیر صحت

نوشہرہ ورکاں (اُردو پوائنٹ اخبارتازہ ترین - اے پی پی۔ 02 جون2025ء) صوبائی وزیر صحت خواجہ سلمان رفیق نے کہا ہے کہ عید قربان پرصوبہ بھر میں امن وامان اور سیکورٹی کے تمام ممکنہ اقدامات کو یقینی بنایا جائیگا، پولیس افسران، جوانوں اوردیگر اداروں کے ساتھ علماء کرام مذہبی راہنماؤں اور ڈویژنل و ڈسٹرکٹ امن کمیٹی کے اراکین کے تعاون سے برقرار رکھا جائے گا، انہوں نے کہا کہ مساجد اور عید گاہوں کی سیکورٹی، راستوں کی صفائی اوردیگر میونسپل سروسز کی فراہمی کے لیے بھی ہدایات جاری کی جا چکی ہیں اور بالخصوص قربانی کے جانوروں کی آلائشوں کو فوری اٹھانے اورمقررہ جگہوں تک پہنچانے کے حوالے سے متعلقہ اداروں کی کار کردگی کو مسلسل مانٹیر کیا جائیگا، تمام متعلقہ ادارے صفائی کے انتظامات کو مؤثر، منظم اور بروقت بنانے کیلئے مکمل تیاری یقینی بنائیں۔

(جاری ہے)

ان خیالات کا اظہار انہو ں نے صوبہ بھر کے ڈویژنل کمشنرز اور ڈپٹی کمشنرز کے ساتھ ایک ویڈیو لنک اجلاس سے خطاب کرتے ہوئے کیا۔کمشنر گوجرانوالہ ڈویژن سید نوید حیدر شیرازی نے لاہور میں چیف سیکرٹری پنجاب کے دفتر میں جبکہ ڈپٹی کمشنر گوجرانوالہ نوید احمد نے کمشنر آفس میں ویڈیو لنک اجلاس میں شرکت کی۔ دریں اثناء چیف سیکرٹری پنجاب زاہد اختر زمان کی زیر صدارت ڈویڑنل کمشنرز اور ڈپٹی کمشنرز کا ویڈیو لنک اجلاس منعقد ہوا جس میں عیدالاضحی کے موقع پر صفائی، آلائشوں کی بروقت تلفی اور دیگر انتظامات کا جائزہ لیا گیا۔

اجلاس سے خطاب کرتے ہوئے چیف سیکرٹری نے ہدایت کی کہ عید کے دوران قربانی کے جانوروں کی آلائشیں فوری طور پر اٹھانے کے لیے خصوصی اقدامات کیے جائیں۔چیف سیکرٹری نے کہا کہ گزشتہ برس صفائی کے حوالے سے کیے گئے اقدامات قابل تحسین تھے، تاہم وزیر اعلیٰ پنجاب کی ہدایت کے مطابق ان انتظامات کو مزید بہتر اور مثالی بنانے کی ضرورت ہے۔ چیف سیکرٹری نے واضح کیا کہ شہریوں کی شکایات کی صورت میں رسپانس ٹائم کم سے کم ہونا چاہیے۔

چیف سیکرٹری نے کہا کہ شہریوں کی سہولت کے لیے تمام اضلاع میں باقاعدہ مویشی منڈیاں قائم کی گئی ہیں، انتظامیہ عید سے قبل غیر قانونی سیل پوائنٹس کے خلاف کریک ڈاؤن جاری رکھے۔ انہوں نے کہا کہ سڑکوں یا دیگر غیر متعین مقامات پر جانوروں کی فروخت کسی صورت برداشت نہیں، خلاف ورزی کرنے والوں کے خلاف فوری کارروائی عمل میں لائی جائے۔