اداکارائیں ہدایت کاروں کی جانب سے ہراساں کرنے سے متعلق جھوٹ بولتی ہیں‘خلیل الرحمن قمر

مرد کی یہ ہمت ہی نہیں کہ وہ کسی عورت کی مرضی کے بغیر اسے ہاتھ لگا سکے‘ معروف مصنف کی گفتگو

جمعہ 6 جون 2025 20:10

اداکارائیں ہدایت کاروں کی جانب سے ہراساں کرنے سے متعلق جھوٹ بولتی ہیں‘خلیل ..

لاہور (اُردو پوائنٹ اخبارتازہ ترین - این این آئی۔ 06 جون2025ء) معروف مصنف خلیل الرحمن قمر نے کہا ہے کہ اداکارائیں جھوٹ بولتی ہیں کیونکہ مرد کی ہمت ہی نہیں کہ وہ کسی عورت کی مرضی کے بغیر اسے ہاتھ لگاسکے۔خلیل الرحمن قمر نے حال ہی میں ایک ڈیجیٹل پوڈکاسٹ میں شرکت کی، جہاں انہوں نے مختلف موضوعات پر کھل کر گفتگو کی۔انہوں نے بتایا کہ ان کی عادت ہے کہ جب بھی وہ موٹروے پر جاتے ہیں تو کوشش کرتے ہیں کہ راستے میں اگر کوئی شخص ملے تو اسے لفٹ دے دیں اور اگر کبھی کوئی مسافر نہیں ملتا تو انہیں لگتا ہے کہ شاید اللہ ناراض ہوگیا ہے اسی لیے کوئی ساتھی نہیں ملا۔

انہوں نے کہا کہ جب وہ مسافروں کو لفٹ دیتے ہیں تو اکثر لوگ انہیں پہچان لیتے ہیں اور جو نہیں پہچانتے انہیں وہ اپنے بارے میں بتادیتے ہیں۔

(جاری ہے)

خلیل الرحمن قمر نے مزید کہا کہ انہیں جھوٹ بولنے والے لوگ ناپسند ہیں اور وہ لوگ بھی جو امیر و غریب میں فرق کرتے ہیں، ان کے نزدیک اصل غریب وہ ہے جس کے پاس ظرف کم ہو۔ان کا کہنا تھا کہ اگر آپ کے بینک میں لاکھوں روپے ہوں لیکن آپ کم ظرف ہیں تو وہ آپ کو غریب سمجھتے ہیں اور حرام کمانے والوں کو بھی وہ غریب ہی سمجھتے ہیں۔

ایک سوال کے جواب میں خلیل الرحمن قمر نے کہا کہ جو اداکارائیں یہ کہتی ہیں کہ ہدایتکاروں نے ان کے ساتھ زیادتی کی یا انہیں ہاتھ لگا دیا، وہ سب جھوٹ بولتی ہیں کیونکہ مرد کی یہ ہمت ہی نہیں کہ وہ کسی عورت کی مرضی کے بغیر اسے ہاتھ لگا سکے۔واضح رہے کہ اکثر اوقات اداکاراں کی جانب سے ڈراموں کے ہدایتکاروں پر الزام لگایا جاتا ہے کہ انہوں نے ان کے ساتھ غیرمناسب رویہ اختیار کرنے کی کوشش کی۔قبل ازیں ایک انٹرویو میں اداکارہ سارہ عمیر نے کہا تھا کہ کئی سال قبل شوٹنگ کے دوران ہدایتکار نے انہیں کئی بار چھونے کی کوشش کی تھی، جس پر انہوں نے غصے میں آ کر ہدایتکار کو تھپڑ مار دیا تھا۔