گرڈسٹیشنز پر نیپرا سیفٹی کوڈکے مطابق عملدرآمد کرتے ہوئے تمام ترحفاظتی اقدامات کو یقینی بنایا جائے،میاں محمد رفیق

* فیصل آباد (اُردو پوائنٹ اخبارتازہ ترین - آن لائن۔ 11 جون2025ء)جنرل مینجر ٹیکنیکل فیسکو میاں محمد رفیق نے کہا ہے کہ گرڈسٹیشنز پر نیپرا سیفٹی کوڈکے مطابق عملدرآمد کرتے ہوئے تمام ترحفاظتی اقدامات کو یقینی بنایا جائے تاکہ ملازمین کی جان کی حفاظت کیساتھ فیسکو کی املاک اورماحولیاتی اثرات پر قابو پانے میں مدد ملے اس سلسلہ میں کسی بھی قسم کی کوتاہی ہرگز برداشت نہیں کی جائے گی یہ باتیںانھوں نے 132کے وی الائیڈ گرڈسٹیشن کے دورہ کے موقع پر کہیں۔

اس موقع پر چیف انجنئیر (پی اینڈ ڈی) عامر محبوب الٰہی ، ڈائریکٹر ہیلتھ سیفٹی کلیم اللہ، سپرنٹنڈنگ انجنئیر(جی ایس او) زبدة الضیاء ، ایڈیشنل ڈائریکٹر سیفٹی محمد امجد، ایکسئین( جی ایس او) اعجاز اللہ خان، اسسٹنٹ ڈائریکٹر سیفٹی عمارافضل چٹھہ ،سیفٹی انسپکٹر محمد اسرار الحق، امجد علی اورعثما ن سلیم بھی موجود تھے۔

(جاری ہے)

انھوں نے مزید کہا کہ گرڈسٹیشنز فیسکو کی ریڑھ کی ہڈی کی حیثیت رکھتے ہیں جہاں پر انتہائی مہنگے آلات نصب ہیں ۔

ہائی وولٹیج سپلائی کو کنٹرول کر کے صارفین تک پہنچانے میں گرڈسٹیشنز اہم کردار ادا کر رہے ہیں۔ انہوں نے گرڈسٹیشن کے مختلف حصوں کا معائنہ کیا اور خصوصی طور پربیٹری روم کا جائزہ لیا اور ڈیوٹی پر موجود عملہ سے تکنیکی نوعیت کے مختلف سوالات بھی کئے ۔اس موقع پر انہوں نے گرڈسٹیشن پر نصب قیمتی آلات ،پاورٹرانسفارمرز،ہائی ٹرانسمیشن لائن، سینڈ بکٹس، پینل کے لاگ آئوٹ، ٹیگ آئوٹ پینل کے فرنٹ اور بیک پر نام، سیفٹی رجسٹر، بیٹری رجسٹر کو چیک کیا اور دیگر تنصیبات کی حفاظت کو یقینی بنانے اورانہیں سیفٹی اصول و قواعد کے مطابق کام کرنے کی ہدایت کی ۔

انہوں نے گرڈپرموجود آگ بجھانے والے آلات کا معائنہ بھی کیا اور انھیں تسلی بخش قرار دیا جبکہ انہیں ہر وقت آپریشنل حالت میں رکھنے کے احکامات بھی دئیے تاکہ گرڈپر کسی قسم کی ناگہانی صورتحال میں انہیں فوری استعمال میں لایاجاسکے ۔انھوں نے کہا کہ فیسکوکے گرڈ اسٹیشنز پربہترین آلات سے مزئین مشینری کی تنصیب کی گئی ہے تا کہ گرڈ سٹیشنوں پر صارفین کو بلا تعطل بجلی کی سپلائی کو یقینی بنایا جاسکے۔اس موقع پر ریذیڈنٹ انجنئیرمحمد نعیم اکرم اورگرڈانچارج عبداللہ اجمل نے جی ایم ٹیکنیکل اور سیفٹی ٹیم کو الائیڈ گرڈ سٹیشن پر نصب پاور ٹرانسفارمر ز، ہائی ٹرانسمیشن لائن اور مختلف فیڈرز کے بارے میں بریفنگ دی۔