خاتون فوڈ سیفٹی آفیسر پر حملہ کرنے والی3ملزمان کو 13سال 5ماہ قید،جرمانے کی سزا

فوڈ پوائنٹ کی چیکنگ کے دوران ملزمان نے خاتون فوڈ سیفٹی آفیسر اور ٹیم پر حملہ کیا تھا

جمعرات 12 جون 2025 13:52

لاہور(اُردو پوائنٹ اخبارتازہ ترین - این این آئی۔ 12 جون2025ء) عدالت نے خاتون فوڈ سیفٹی آفیسر پر حملہ کرنے والی3ملزمان کو 13سال 5ماہ قید،6لاکھ25ہزارفی کس جرمانے کی سزا سنا دی ۔ سپیشل کورٹ نے مقدمہ نمبر 121/22کی سماعت میں ملزمان محمد افضل، محمد اکبر اور محمد ندیم کو سزا سنائی۔

(جاری ہے)

ڈی جی فوڈاتھارٹی عاصم جاوید نے بتایا کہ فوڈ پوائنٹ کی چیکنگ کے دوران ملزمان نے خاتون آفیسر اور ٹیم پر حملہ کیا تھا،ملزمان نے خاتون فوڈ سیفٹی آفیسر کو چیکنگ کرنے پرسر پر لوہا کا راڈ مار کر شدید زخمی کر دیا تھا،حملے میں اسسٹنٹ فوڈ سیفٹی آفیسر اورڈرائیور بھی شدید زخمی ہوئے تھے۔

ڈی جی فوڈاتھارٹی نے آفسران کومزاحمت کے باوجود اپنے فرائض بہادری سے ادا کرنے پرشاباش،نقد انعام اور تعریفی اسناد دیں۔انہوں نے کہا کہ پنجاب فوڈاتھارٹی ٹیموں کو اپنے فرائض کی ادائیگی میں روزانہ کی بنیاد پر پر تشدد مزاحمت کا سامنا کرنا پڑتا ہے، فوڈ سیفٹی آفیسرز سخت موسم ہو یا تہوار، چھٹی ہو یا کام کا دن بلا تعطل اپنے فرائض کی ادائیگی جاری رکھے ہوئے ہیں ، ملاوٹ اور جعلسازی کرنے والے عناصر کا خاتمہ اولین ترجیح ہے، معیاری خوراک کی فراہمی میں رکاوٹ بننے والے تمام عناصر کے خاتمے کے لیے ہر ممکن اقدامات کیے جارہے ہیں۔