ایران نے جوہری عدم پھیلاؤ کے حوالے سے اپنے وعدوں کی خلاف ورزی کی ہے، آئی اے ای اے

جمعرات 12 جون 2025 16:18

ویانا (اُردو پوائنٹ اخبارتازہ ترین - اے پی پی۔ 12 جون2025ء) جوہری توانائی کی بین الاقوامی ایجنسی آئی اے ای اے نے کہا ہے کہ ایران نے جوہری عدم پھیلاؤ کے حوالے سے اپنے وعدوں کی خلاف ورزی کی ہے۔بی بی سی کے مطابق انٹرنیشنل اٹامک انرجی ایجنسی (آئی اے ای اے) نے 3 یورپی ممالک کی طرف سے ایران کے خلاف پیش کی گئی قرارداد کی منظوری دیتے ہوئے اعلان کیا ہے کہ ایران اپنی جوہری ذمہ داریوں پر عمل نہیں کر رہا۔

یہ قرارداد انٹرنیشنل اٹامک انرجی ایجنسی کے 35 رکنی بورڈ آف گورنرز نے منظور کی، جس میں 19 ارکان نے اس کی حمایت میں اور 3 نے مخالفت میں ووٹ دیئے ۔ 11 ممالک نے غیر جانبداری اختیار کی اور2نے ووٹ ہی نہیں دیا۔جمعرات کو منظور کی جانے والی اس قرارداد میں کہا گیا ہے کہ ایران نے جوہری عدم پھیلاؤ کے اپنے وعدوں کی خلاف ورزی کی ہے۔

(جاری ہے)

قرار داد کے متن میں کہا گیا کہ بورڈ آف گورنرز اعلان کرتا ہے کہ سنہ 2019 سے ایران میں متعدد خفیہ مقامات پر غیر اعلانیہ جوہری سرگرمیوں کے بارے میں ایجنسی کے ساتھ مکمل اور بروقت تعاون فراہم کرنے کی اپنی ذمہ داریوں کو پورا کرنے میں ایران کی متعدد ناکامیاں بین الاقوامی ایجنسی کے ساتھ حفاظتی معاہدے کے تحت ذمہ داریوں کی عدم تعمیل ہے۔

یاد رہے کہ اس سے قبل اقوام متحدہ میں ایران کے مستقل نمائندہ امیر سعید ایروانی نے اقوام متحدہ کی سلامتی کونسل کو ایک خط بھیجا تھا جس میں ایران کی جانب سے یورپی ممالک کے بیانات کو مسترد کیا گیا تھا۔