Live Updates

سیالکوٹ،غیر قانونی تعمیرات کے خلاف زیرو ٹالرنس، سالڈ ویسٹ مینجمنٹ پر سخت احکامات، ڈپٹی کمشنر صبا اصغر علی

پیر 16 جون 2025 18:07

سیالکوٹ (اُردو پوائنٹ اخبارتازہ ترین - اے پی پی۔ 16 جون2025ء) ڈپٹی کمشنر سیالکوٹ صبا اصغر علی کی زیر صدارت ضلع کونسل، میونسپل کارپوریشن اور میونسپل کمیٹیوں ڈسکہ، پسرور اور سمبڑیال کی حدود میں غیر قانونی تعمیرات کے تدارک کے حوالے سے خصوصی اجلاس منعقد ہوا۔ اجلاس میں سی ای او ضلع کونسل فیصل شہزاد، سی ای او میونسپل کارپوریشن ملک اعجاز احمد، ڈسٹرکٹ آفیسر پلاننگ عمر فاروق سمیت انفورسمنٹ و بلڈنگ انسپکٹرز اور متعلقہ افسران نے شرکت کی۔

ڈپٹی کمشنر نے اجلاس سے خطاب کرتے ہوئے کہا کہ ضلع بھر میں غیر قانونی تعمیرات کے خلاف زیرو ٹالرنس پالیسی اپنائی جائے گی اور اس ضمن میں کسی کے ساتھ کوئی رعایت نہیں برتی جائے گی۔ انہوں نے ہدایت کی کہ منظور شدہ بلڈنگ پلانز کو کیو آر کوڈز جاری کیے جائیں تاکہ انسپکشن کے دوران فوری تصدیق ممکن ہو سکے۔

(جاری ہے)

انہوں نے ہدایت کی کہ دکانداروں اور ریسٹورنٹ مالکان کو سالڈ ویسٹ کی خود ذمہ داری سے منظم طریقے سے تلفی کا پابند بنایا جائے۔

جو دکاندار یا کاروباری شخص اپنا کوڑا کرکٹ سڑک یا سیوریج لائن میں پھینکے، اس کے خلاف فوری جرمانہ کیا جائے اور بار بار خلاف ورزی کرنے والوں کے خلاف قانونی کارروائی کی جائے۔ ڈپٹی کمشنر نے کہا کہ سالڈ ویسٹ سے متعلق جرمانوں کے عمل کو شفاف اور مانیٹر ایبل بنانے کیلئے ایک موبائل ایپ تیار کی جائے گی، جس سے تمام کارروائی کو ایک مربوط پورٹل کے ذریعے مانیٹر کیا جا سکے گا۔ مزید برآں انہوں نے بتایا کہ نالہ بھیڈ کی ڈی سلٹنگ کے لیے بھاری مشینری کے ذریعے صفائی کا عمل شروع کیا جا چکا ہے جبکہ دیگر نالوں اور سیور لائنوں کی صفائی بھی طے شدہ پلان کے مطابق جاری رہے گی۔