Live Updates

خیبرپختونخواہ حکومت کا 2 ہزار سے زائد نئے ترقیاتی منصوبے شروع کرنے کا فیصلہ

خیبر پختونخواہ حکومت نے مالی سال 26-2025 کے بجٹ میں ترقیاتی منصوبوں کے لیے بڑے پیمانے پر فنڈز مختص کر دیئے

محمد علی بدھ 18 جون 2025 00:00

پشاور(اُردو پوائنٹ اخبارتازہ ترین۔ 17 جون2025ء) خیبرپختونخواہ حکومت کا 2 ہزار سے زائد نئے ترقیاتی منصوبے شروع کرنے کا فیصلہ، خیبر پختونخواہ حکومت نے مالی سال 26-2025 کے بجٹ میں ترقیاتی منصوبوں کے لیے بڑے پیمانے پر فنڈز مختص کر دیئے۔ تفصیلات کے مطابق تحریک انصاف کی خیبرپختونخواہ حکومت نے صوبے میں ترقیاتی منصوبوں کا نیا جال بچھانے کا فیصلہ کیا ہے۔

میڈیا رپورٹس کے مطابق خیبر پختونخواہ حکومت نے مالی سال 26-2025 کے بجٹ میں ترقیاتی منصوبوں کے لیے بڑے پیمانے پر فنڈز مختص کر دیئے، آئندہ سال مجموعی طور پر 2159 ترقیاتی منصوبے تجویز کیے گئے ہیں جن میں سے 810 نئے منصوبے شامل ہیں۔ محکمہ خزانہ کی دستاویزات کے مطابق سب سے زیادہ فنڈز سڑکوں کی تعمیر و مرمت کے لیے مختص کیے گئے ہیں، روڈ سیکٹر میں 221 نئے ترقیاتی منصوبے شامل کیے گئے ہیں جو کہ تمام شعبہ جات میں سب سے زیادہ ہیں۔

(جاری ہے)

محکمہ صحت کے لیے 93، آب رسانی کے لیے 69 جبکہ میونسپل سروسز ڈیلیوری میں 60 نئے ترقیاتی منصوبے تجویز کیے گئے ہیں، اسی طرح تعلیم اور جنگلات کے شعبوں میں 29، زراعت میں 18 اور صنعت میں 22 نئے منصوبوں پر کام کیا جائے گا۔ تمام نئے ترقیاتی منصوبوں پر مجموعی طور پر 88 ارب 13 کروڑ روپے کی لاگت آئے گی، جاری اور نئے منصوبوں کو ملا کر یہ تعداد 1349 جاری اور 810 نئے منصوبوں پر مشتمل ہے۔ صوبائی حکومت کا دعویٰ ہے کہ ان منصوبوں سے نہ صرف انفراسٹرکچر بہتر ہوگا بلکہ روزگار کے مواقع بھی پیدا ہوں گے اور عوامی خدمات کی فراہمی میں بہتری آئے گی۔