غیرقانونی کمرشل عمارتوں، کمرشل فیس نادہندگان املاک کے خلاف بلاامتیاز کارروائیاں جاری ہیں، ڈی جی ایل ڈی اے

بدھ 18 جون 2025 20:50

لاہور (اُردو پوائنٹ اخبارتازہ ترین - اے پی پی۔ 18 جون2025ء) ڈائریکٹر جنرل لاہور ڈویلپمنٹ اتھارٹی (ڈی جی ایل ڈی اے ) طاہر فاروق کی ہدایات پر ایل ڈی اے ٹاون پلاننگ ونگ غیرقانونی کمرشل عمارتوں، کمرشل فیس نادہندگان املاک کے خلاف متحرک ہے۔ ایل ڈی اے ٹیموں نے گزشتہ روزمختلف سکیموں اور ایل ڈی اے کنٹرولڈ ایریا میں آپریشن کرکے102املاک سربمہرکر دیں۔

ایل ڈی اے ٹیموں نے گلبرگ،گارڈن ٹاون، فیصل ٹاون،قائد اعظم ٹاون، شادمان، شاہ جمال، مین یو بی ڈی کینال روڈ، نیو مسلم ٹاون، سبزہ زار میں آپریشن کیا۔

(جاری ہے)

ٹیموں نے غیرقانونی کمرشل استعمال، کمرشل فیس کی عدم ادائیگی پرگلبرگ،گارڈن ٹاون، فیصل ٹاون میں 41املاک قائداعظم ٹاون میں 2درجن سے زائد املاک، شادمان، شاہ جمال، مین یو بی ڈی کینال روڈ،نیو مسلم ٹاون میں 18املاک سربمہر کر دیں۔

ٹیموں نے ریکوری آپریشن کے دوران سبزہ زار میں 31املاک سیل کر دیں۔ سیل کی گئی املاک میں نجی سکول،کلینک، کیفے، گراسری سٹور، فوڈ پوائنٹ،سینٹری والیکٹرک شاپس، ورکشاپ، دکانیں، دفاتر ودیگر شامل ہیں۔ آپریشن چیف ٹاون پلانرون اسد الزمان کی زیر نگرانی کیا گیا۔انہوں نے ہدایت پرغیرقانونی کمرشل عمارتوں، کمرشل فیس نادہندگان املاک کے خلاف بلاامتیاز کارروائیاں جاری ہیں۔