پاکستان کا جدید ریموٹ سینسنگ سیٹلائٹ کامیابی سے مدار میں پہنچ گیا

ہفتہ 16 اگست 2025 22:46

اسلام آباد(اُردو پوائنٹ اخبارتازہ ترین - آن لائن۔ 16 اگست2025ء)پاکستان کا نیا ریموٹ سینسنگ سیٹلائٹ کامیابی سے مدار میں داخل ہوگیا۔ترجمان سپارکو کے مطابق پاکستان کا جدید ریموٹ سینسنگ سیٹلائٹ کامیابی سے مدار میں پہنچ گیا‘ سیٹلائٹ نے گراؤنڈ اسٹیشنز سے مستحکم رابطہ بھی قائم کر لیا۔ہائی ریزولوشن تصاویر زمین پر بھیجنے کا عمل شروع ہوچکا۔

ترجمان سپارکوکے مطابق اس سیٹلائیٹ کی مدد سے شہری منصوبہ بندی اور انفراسٹرکچر ڈیولپمنٹ میں انقلاب آئے گا۔ سیٹلائٹ قدرتی آفات کی بروقت مانیٹرنگ میں معاون ثابت ہوگا۔

(جاری ہے)

سیلاب، زلزلے اور لینڈ سلائیڈنگ کے فوری ڈیٹا سے ریلیف ممکن ہوگا۔ماحولیات میں گلیشیئر پگھلنے اور جنگلات کی کٹائی کی نگرانی ممکن ہوگی۔ زراعت میں فصلوں کی نقشہ سازی اور پانی کے وسائل کے بہتر استعمال میں مددملے گی۔

سیٹلائٹ غذائی تحفظ اور زرعی پیداوار بڑھانے میں اہم کردار ادا کرے گا۔ ترجمان سپارکوکے مطابق سی پیک منصوبوں میں جغرافیائی خطرات کی شناخت اور نیٹ ورکس کی نقشہ سازی ممکن ہوگی۔پائیدار سماجی و اقتصادی ترقی کے لیے فیصلہ سازی میں بہتری آئے گی۔سیٹلائٹ کی مدار میں کامیاب گردش پاکستان کی تکنیکی خودمختاری اور خلا پر مبنی ٹیکنالوجی میں بڑا قدم ہے۔