وفاقی وزیرانجینئر امیر مقام کی جانب سے خیبرپختونخوا کی مختلف ضلعی اورتحصیل بارز کو امدادی چیکس تقسیم

بدھ 25 جون 2025 22:20

اسلام آباد (اُردو پوائنٹ اخبارتازہ ترین - اے پی پی۔ 25 جون2025ء) وفاقی وزیر برائے امور کشمیرو گلگت بلتستان اورسیفران انجینئر امیر مقام نے خیبرپختونخوا کی مختلف ضلعی اور تحصیل بارز کے صدور کو مالی امداد کے چیکس تقسیم کیے۔ یہ تقریب پارلیمنٹ ہائوس میں وفاقی وزیر کے چیمبر میں منعقد ہوئی۔وفاقی وزیر نے مالی امداد کے چیکس ضلع بار مہمند، ضلع بار کوہستان اور تحصیل نتگی بار کے عہدیداران کو دیئے۔

اس موقع پر انجینئر امیر مقام نے وفاقی حکومت کی جانب سے اداروں کے استحکام خاص طور پر بار کونسلز اور امدادی اداروں کی مضبوطی کے عزم کا اعادہ کیا۔ انہوں نے کہا کہ وکلا آئینی حقوق کے تحفظ میں مرکزی کردار ادا کرتے ہیں اور حکومت انصاف کے فروغ اور معاشرتی خدمت میں وکلاء برادری کے ساتھ کھڑی ہے۔

(جاری ہے)

بارز کے رہنمائوں نے بروقت معاونت اور ان کے کردار کو تسلیم کرنے پر وفاقی وزیر انجینئر امیر مقام کا دلی شکریہ ادا کیا اور اسے انصاف تک رسائی اور قانون کی بالادستی کے فروغ کی جانب اہم قدم قرار دیا۔

اس موقع پر قومی اسمبلی کی قائمہ کمیٹی کے چیئرمین اور رکن قومی اسمبلی کوہستان ادریس خان، مسلم لیگ (ن) کے مرکزی ایڈیشنل سیکرٹری اطلاعات سینیٹر زاہد خان، سابق رکن صوبائی اسمبلی جمشید خان مہمند، یوتھ میڈیا ٹیم کے صدر علی خان یوسفزئی، سابق ایم پی اے بلاول آفریدی، ضم شدہ اضلاع کے کوآرڈینیٹر زر خان صافی اور دیگر سیاسی شخصیات و وکلا نے بھی شرکت کی۔