یونیورسٹی آف انجینئرنگ اینڈ ٹیکنالوجی پشاور میں بیسٹ ٹیچر ایوارڈ کی تقریب کا انعقاد

پشاور (اُردو پوائنٹ اخبارتازہ ترین - اے پی پی۔ 26 جون2025ء) یونیورسٹی آف انجینئرنگ اینڈ ٹیکنالوجی پشاور کے فیکلٹی آف مکینیکل، کیمیکل اینڈ انڈسٹریل انجینئرنگ کے اساتذہ میں بیسٹ ٹیچر ایوارڈ کی اسناد تقسیم کرنے کی تقریب ویڈیو کانفرنس ہال میں منعقد ہوئی۔ وائس چانسلر پروفیسر ڈاکٹر صادق خٹک نے تقریب میں بطور مہمانِ خصوصی شرکت کی اور نمایاں کارکردگی کے حامل اساتذہ میں ایوارڈز تقسیم کیے۔

پروفیسر ڈاکٹر مدثر حبیب نے تقریب کی میزبانی کے فرائض انجام دئیے۔تقریب سے خطاب کرتے ہوئے پروفیسر ڈاکٹر رضوان ایم گل ،ڈین فیکلٹی آف مکینیکل، کیمیکل اینڈ انڈسٹریل انجینئرنگ سینئر ڈین نے ایوارڈ حاصل کرنے والے اساتذہ کو مبارکباد پیش کی اور تدریسی معیار میں ان کی شاندار خدمات کو سراہا۔

(جاری ہے)

انہوں نے بتایا کہ یہ ایوارڈز تعلیمی سال 2024-25 کیلئے اُن اساتذہ کو دیے گئے جنہوں نے فائنل ایئر طلباء کی جانب سے تدریسی کارکردگی کے اعتراف میں اعلیٰ ترین اسکور حاصل کیے۔

انہوں نے کہا کہ اس عمل میں ہائر ایجوکیشن کمیشن کے مقرر کردہ اصولوں اور معیار کو مدنظر رکھا گیا۔ اس موقع پر وائس چانسلر پروفیسر ڈاکٹر صادق خٹک نے پروفیسر ڈاکٹر رضوان ایم گل اور ان کی ٹیم کی کاوشوں کو سراہتے ہوئے کہا کہ یہ اقدام تدریسی معیار کو فروغ دینے میں اہم کردار ادا کرے گا۔ انہوں نے یہ طریقہ کار دیگر فیکلٹیز میں بھی شروع کرنے پر زور دیا تاکہ اساتذہ کی پیشہ ورانہ ترقی کی حوصلہ افزائی کی جا سکے۔

وائس چانسلر نے ایوارڈ جیتنے والے اساتذہ کو ان کی شاندار تدریسی کارکردگی پر مبارکباد دی اور کہا کہ یہ اعزاز آپ کی محنت، لگن اور ہمارے طلبا، جامعہ اور معاشرے کے لیے آپ کی قیمتی خدمات کا اعتراف ہے۔ انہوں نے یو ای ٹی پشاور کی مالی خود کفالت اور تعلیمی ترقی کے لیے اپنے وژن پر بھی روشنی ڈالی۔آخر میں وائس چانسلر اور ڈین نے بیسٹ ٹیچر ایوارڈ جیتنے والے اساتذہ میں سرٹیفیکیٹس تقسیم کیے جن میں انجینئر سلطان علی، شعبہ آف کیمیکل انجینئرنگ،ڈاکٹر ضیاء الرحمٰن آفریدی، شعبہ آف انرجی انجینئرنگ،ڈاکٹر سکندر بلال خٹک، شعبہ انڈسٹریل انجینئرنگ(پشاور کیمپس)،انجینئر محسن اقبال قاضی، شعبہ انڈسٹریل انجینئرنگ (جلو زئی کیمپس)،انجینئر ارسلان خان، شعبہ مکینیکل انجینئرنگ( پشاور کیمپس)،انجینئر اصناف عزیز، شعبہ مکینیکل انجینئرنگ( جلو زئی کیمپس)ڈاکٹر گلبدن سکندر، شعبہ میکاٹرونکس انجینئرنگ، حیات آباد کیمپس شامل تھے۔