لاہور، نجی ہسپتال سے ملنے والی غیر ملکی خاتون کی لاش کی شناخت ہوگئی

مقتولہ چومبا کیرن زیمبیا کی شہری تھی اور لاش چھوڑ کربھاگنے والا اس کا ہی ساتھی نکلا، مقتولہ چومبا کیرن کو ہسپتال میں چھوڑنے والے شخص کی شناخت ولیری نکومبو کے نام سے ہوئی ہے،ڈی آئی جی آپریشنز

فیصل علوی جمعہ 27 جون 2025 11:58

لاہور، نجی ہسپتال سے ملنے والی غیر ملکی خاتون کی لاش کی شناخت ہوگئی

لاہور(اردوپوائنٹ اخبار تازہ ترین۔27جون 2025)صوبائی دارالحکومت لاہور کے نجی ہسپتال سے ملنے والی غیر ملکی خاتون کی لاش کی شناخت ہوگئی،مقتولہ چومبا کیرن زیمبیا کی شہری تھی اور لاش چھوڑ کربھاگنے والا اس کا ہی ساتھی نکلا جس کی سی سی ٹی وی فوٹیج بھی منظرعام پر آگئی،سی سی ٹی وی فوٹیج میں دیکھا گیا کہ ملزم خاتون کو چھوڑ کر فرار ہو رہا ہے۔ ڈاکٹروں نے خاتون کو چیک کیا تو پتہ چلا کہ وہ پہلے ہی دم توڑ چکی ہے۔

ڈی آئی جی آپریشنز فیصل کامران کے مطابق مقتولہ چومبا کیرن کو ہسپتال میں چھوڑنے والے شخص کی شناخت ولیری نکومبو کے نام سے ہوئی ہے۔ گزشتہ روزدو افرادنشتر کالونی کے نجی ہسپتال میں غیرملکی خاتون کی لاش چھوڑ کرفرار ہوگئے تھے۔ خیال رہے کہ لاہور کے نجی ہسپتال میں 2 افراد 40 سالہ غیر ملکی خاتون کی لاش چھوڑ کر فرار ہوگئے تھے۔

(جاری ہے)

پولیس کے مطابق خاتون اور ملزم دونوں نشتر ٹاؤن گلشن مدینہ کالونی میں کرائے پر رہتے تھے۔

ملزم خاتون کو کرائے کی گاڑی میں ہسپتال لے کر آیا تھا۔ ملزم کی گرفتاری کیلئے ٹیم تشکیل دی گئی تھی۔ بتایاگیاتھا کہ خاتون کی لاش کو ہسپتال میں چھوڑ کر جانے والے دونوں افراد بھی غیر ملکی تھے۔نامعلوم غیر ملکی مرد اور خاتون لاش کو وہیل چیئر پر ہستال لے آکر آئے اور موقع ملتے ہی چھوڑ کر فرار ہوگئے۔پولیس کا کہنا ہے کہ شبہ ہے متوفیہ کی موت منشیات کی زیادتی سے ہوئی تھی۔

خاتون کی لاش تحویل میں لے کر پوسٹ مارٹم کیلئے بھجوا دی گئی تھی جب کہ تحقیقات کا آغاز کر دیا گیا تھا۔پولیس کے مطابق لاش چھوڑ کر جانے والوں میں نامعلوم خاتون اور مرد شامل ہیں، کار سوار خاتون اور مرد نے 40 سالہ عورت کی لاش وہیل چیئر پر چھوڑی تھی۔لاش چھوڑ کر فرار ہونے والے بھی غیر ملکی افریقی شہری ہیں۔ کلوز سرکٹ فوٹیج اور دیگر شواہد کی مدد سے تفتیش شروع کر دی گئی تھی۔پولیس کے مطابق شبہ ہے کہ منشیات کے زیادہ استعمال سے خاتون کی موت ہوئی تھی۔پولیس نے لاش تحویل میں لیکر پوسٹ مارٹم کیلئے بھجوا دیا تھا۔