زرعی شعبے کو فروغ دیکر کاشتکاروں کو خوشحال بنانا ہوگا ، کمشنر میرپورخاص

جمعہ 27 جون 2025 16:51

میرپور خاص (اُردو پوائنٹ اخبارتازہ ترین - اے پی پی۔ 27 جون2025ء) کمشنر میرپور خاص فیصل احمد عقیلی نے ضلع کونسل چئیرمین میر انور علی تالپور کے ہمراہ کمشنر کمیٹی ہال میں زرعی شعبے کو فروغ دینے اور کاشتکاروں کو مربوط خوشحال بنانے کے متعلق ایک اجلاس کی صدارت کی۔ اس موقع پر کمشنر نے کہا کہ اجلاس کا مقصد محکمہ زراعت کی جانب سے ہونے والے زرعی ترقیاتی کاموں اور کاشتکاروں کو فراہم کردہ زرعی فوائد کے متعلق تفصیلات معلوم کرنا ہے تاکہ زرعی شعبے میں مزید بہتری و اصلاحات لاکر زیادہ سے زیادہ چھوٹے کاشتکاروں کو فائدہ پہنچایا جا سکے اور وہ زرعی فوائد حاصل کرکے زرعی انقلاب میں اپنا کردار ادا کر سکیں۔

اس موقع پر ضلع کونسل چئیرمین میر انور تالپور نے کہا کہ حکومت سندھ کی جانب سے زراعت شعبے کے فروغ اور کاشتکاروں کی خوشحالی کے لیے کئی منصوبے بنائے گئے ہیں جس سے چھوٹے کاشتکارمستحکم اور مضبوط ہو کر زرعی انقلاب میں اپنا کردار ادا کر رہے ہیں۔

(جاری ہے)

اس موقع پر ڈائریکٹر جنرل ایگریکلچر ریسرچ ڈاکٹر مظھرالدین کیریو نے بتایا کہ زرعی تحقیقی ادارے حکومت سندھ کی جانب سے فصلوں کی بہتر کاشت کے لیے مختلف قسم کے اجناس متعارف کروا رہی ہے جس کا بنیادی مقصد زرعی اجناس متعارف کرواکر زرعی کاشت پیداوار میں اضافہ کرنا ہے۔

قبل ازیں ایرڈ زون زرعی ریسرچ سینٹر عمرکوٹ کے ڈائریکٹر ڈاکٹر عطاء اللہ خان نے بتایا کہ ايرڈ زون سینٹر بایو سلائن (کھارے پانی) سے مختلف زرعی اجناس متعارف کروا رہی ہے جس میں بیر، کھجور اور دیگر فصلیں شامل ہیں۔\378