باغات کے ارد گرد اونچے درختوں کی گھنی ہوا توڑ باڑیں پودوں اور پھل کو گرمی کے مضر اثرات سے محفوظ رکھتی ہیں،محکمہ زراعت

منگل 1 جولائی 2025 16:19

فیصل آباد (اُردو پوائنٹ اخبارتازہ ترین - اے پی پی۔ 01 جولائی2025ء) باغات کے ارد گرد باڑ کے طور پر لگائے ہوئے اونچے درختوں کی گھنی ہوا توڑ باڑیں پودوں اور پھل کو گرمی کے مضر اثرات سے محفوظ رکھتی ہیں لہٰذاباغبان موسم گرما کے دوران ان ہوا توڑ باڑوں کی کانٹ چھانٹ نہ کریں تاکہ گرمی کی شدت کے باعث پودوں کو نقصان پہنچنے کا احتمال نہ رہے۔نظامت زرعی اطلاعات محکمہ زراعت کے ترجمان کے مطابق گرمیوں کے موسم میں پھلدار پودوں کے تنوں کو نیلاتھوتھا اور چونے کا محلول ملا کر سفیدی کرنے سے گرمی کے اثرات سے محفوظ رکھاجاسکتاہے کیونکہ اس طرح تنے کا چھلکا پھٹنے سے محفوظ رہتاہے۔

انہوں نے کہاکہ نئے لگائے گئے پودے گرمی سے زیادہ متاثر ہوتے ہیں اسلئے ان پودوں پر سرکنڈے، پرالی یا ٹاٹ وغیرہ سے سایہ کریں۔

(جاری ہے)

انہوں نے کہاکہ موسم گرما میں زیادہ ہل چلانے اور گوڈیاں کرنے سے زمینی درجہ حرارت ناموافق حد تک بڑھ جاتا ہے جو کہ پودوں کیلئے نقصان کا باعث بنتا ہے۔انہوں نے باغبانوں کو مختلف پھلوں کے باغات لگانے سے قبل شروع کے چند سالوں تک جنتر کاشت کرنے کی بھی ہدایت کی اور کہا کہ نئے لگائے جانیوالے باغات میں شروع کے چند سالوں میں جنتر کاشت کرنے سے پودوں پر گرمی کا اثر کم پڑتاہے اسلئے پودوں کی افزائش نسل بہتر ہوتی ہے اورانہیں شدید گرمی سے نقصان پہنچنے کااحتمال بھی کم سے کم ہو جاتاہے۔

انہوں نے بتایاکہ باغبانوں کو نرسری سے پودے خریدتے وقت جھاڑی دار پودوں کا چناؤ کرناچاہیے۔