وفاقی وزیر خالد حسین مگسی کا پی سی ایس آئی آر لیبارٹریز کمپلیکس کا دورہ،ادارے کے دس مرکزی مراکز میں جاری تحقیق و ترقی کے منصوبوں پر بریفنگ دی

منگل 1 جولائی 2025 17:07

اسلام آباد (اُردو پوائنٹ اخبارتازہ ترین - این این آئی۔ 01 جولائی2025ء)وفاقی وزیر سائنس و ٹیکنالوجی خالد حسین مگسی نے پی سی ایس آئی آر لیبارٹریز کمپلیکس لاہور کا دورہ کیا۔ اس موقع پر ڈائریکٹر جنرل ڈاکٹر قرة العین سید نے انہیں ادارے کے دس مرکزی مراکز میں جاری تحقیق و ترقی کے منصوبوں پر بریفنگ دی۔ وزارت سائنس و ٹیکنالوجی سے منگل کو جاری بیان کے مطابق وفاقی وزیر نے ڈسپلے ہال کا دورہ کیا جہاں دواسازی، خوراک، کیمیکل، بائیوٹیکنالوجی، لیبارٹری آلات اور توانائی بچانے والے گھریلو آلات سمیت مختلف شعبوں میں تیار کردہ مقامی ٹیکنالوجیز کی نمائش کی گئی۔

بعد ازاں انہوں نے ٹیکنالوجی اینڈ انوویشن سپورٹ سینٹر کا بھی دورہ کیا جہاں انہیں ‘‘پیٹنٹ وال’’ کے ذریعے پی سی ایس آئی آر کی رجسٹرڈ ایجادات سے آگاہ کیا گیا اور صنعت کے ساتھ علم کی منتقلی کے اقدامات پر بریفنگ دی گئی۔

(جاری ہے)

دورے کا اہم پہلو پی سی ایس آئی آر کی انڈسٹریل ہیمپ سے تیار کردہ مصنوعات کے حوالے سے وفاقی وزیر کی تعریف تھی۔

ان مصنوعات میں خوراک، کاسمیٹکس، ادویات، اور ماحول دوست تعمیراتی مواد شامل ہیں، جو معیار، حفاظت، اور پائیداری کے اعلیٰ اصولوں پر پورا اترتی ہیں۔ وفاقی وزیر نے تحقیق پر مبنی صنعتوں کی سرکاری سرپرستی اور انڈسٹریل ہیمپ کی صنعت کو فروغ دینے کے عزم کا اعادہ کیا۔ بیان کے مطابق انڈسٹریل ہیمپ پر مبنی مصنوعات کی تیاری کے لائسنس کے اجراء سے قومی سطح پر خاطر خواہ فوائد حاصل ہوں گے۔