کمشنر کا سوشل سکیورٹی ہسپتال گوجرانوالہ کا دورہ،مریضوں کو فراہم طبی سہولیات و دیگر امور کا جائزہ لیا

جمعرات 3 جولائی 2025 23:10

لاہور (اُردو پوائنٹ اخبارتازہ ترین - اے پی پی۔ 03 جولائی2025ء) کمشنر سوشل سکیورٹی محمد علی کا سوشل سکیورٹی ہسپتال گوجرانوالہ کا دورہ، ہسپتال کے مختلف شعبہ جات کا معائنہ، مریضوں کو فراہم کی جانے والی طبی سہولیات، میڈیسن سٹور صفائی کے انتظامات، داکڑ و دیگر عملے کی حاضری اور انتظامی امور کا جائزہ لیا۔ترجمان کے مطابق انہوں نے ہسپتال میں داخل مریضوں اور ان کے اہل خانہ سے بھی براہ راست بات کی تاکہ ان کی شکایات اور رائے معلوم کی جا سکے۔

اس موقع پرہسپتال میں جاری شام کی شفٹ کے بارے میں میڈیکل سپرنٹنڈنٹ نے کمشنر محمد علی کو تفصیلی بریفنگ دی جس میں سٹاف کی ڈیوٹی روسٹر، شام کی شفٹ میں مریضوں کی تعداد اور سہولیات بارے آگاہ کیا۔ کمشنر نے ہسپتال کے کیفے ٹیریا کا بھی خصوصی معائنہ کیا جہاں انہوں نے صفائی، خوراک کے معیار کو چیک کیا۔

(جاری ہے)

شام کی شفٹ میں کام کرنے والے عملے کی کارکردگی کو سراہتے ہوئے انہوں نے کہا کہ شام کے اوقات میں بھی سینئر کنسلٹنٹس اور ماہر ڈاکٹرز موجود ہوں گے تاکہ محنت کش اور ان کے اہل خانہ با آسانی اپنا علاج کروا سکیں، یہ سہولت اس لیے اہم ہے کہ محنت کشوں کو دن کے وقت کام سے چھٹی لینے کی ضرورت نہیں پڑے گی ، اس سے ان کا روزگار متاثر نہیں ہوگا اور آجرین کو بھی عملے کی غیر حاضری کا سامنا نہیں کرنا پڑے گا۔

انہوں نے کہا کہ شام کی شفٹ کا آغاز محنت کشوں کی صحت، وقت اور روزگار کے تحفظ کی جانب ایک بڑا قدم ہے۔کمشنر محمد علی نے ہسپتال انتظامیہ کو ہدایت کی کہ مریضوں کو سہولیات کی فراہمی میں کسی قسم کی غفلت برداشت نہیں کی جائے گی، سروس ڈیلیوری اور انتظامی امور کو ہر صورت بہتر بنایا جائے۔ کمشنر نے ڈائریکٹوریٹ آف سوشل سکیورٹی گوجرانوالہ کا بھی دورہ کیا اور دفتر کے مختلف شعبہ جات کو چیک کیا،اس موقع پر متعلقہ ڈائریکٹر نے کمشنر کو کارکردگی بارے بریفنگ دی۔ کمشنر نے کنٹری بیوشن ٹارگٹس کو کو یقینی بنانے اور زیادہ سے زیادہ ورکرز کو سوشل سکیورٹی کے دائرہ کار میں لانے کی ہدایت کی۔ انہوں نے کہا کہ کسی بھی ایریا میں کوئی یونٹ غیر رجسرڈ نہیں ہونا چاہیے۔