ویب سیریز اسکوئڈ گیم 3 نے ریلیز کے تین دن میں نیا عالمی ریکارڈ قائم کر دیا

ہفتہ 5 جولائی 2025 11:28

نیویارک(اُردو پوائنٹ اخبارتازہ ترین - این این آئی۔ 05 جولائی2025ء)اسٹریمنگ سائٹ نیٹ فلکس کی عالمی مقبول کورین سیریز اسکوئڈ گیم کے تیسرے اور آخری سیزن نے نیا ریکارڈ بنا دیا۔غیر ملکی میڈیا رپورٹ کے مطابق نیٹ فلکس کی معروف کورین سیریز اسکوئڈ گیم کا تیسرا سیزن 27جون کو ریلیز ہوا اور ابتدائی 72گھنٹوں میں ہی دنیا بھر میں دھوم مچا دی۔ صرف تین دنوں میں اس سیزن کو 6کروڑ 10لاکھ بار دیکھا گیا، جو نیٹ فلکس کی تاریخ کی سب سے بڑی عالمی اوپننگ بن گئی۔

(جاری ہے)

سیریز 93ممالک میں پہلے نمبر پر رہی اور غیر انگریزی زبان میں بننے والی نویں سب سے زیادہ دیکھی جانے والی سیریز بن گئی۔نئے سیزن میں پہلے کے سیزنز کے مقابلے میں گیمز نہایت سخت ہیں اور پرتشدد مناظر شامل کیے گئے ہیں، جن پر ناظرین نے مختلف آرا کا اظہار کیا۔ کچھ نے ان مناظر کو حقیقت سے قریب تر قرار دیا، جبکہ دیگر نے اسے غیر ضروری حد تک پر تشدد سمجھا۔سیریز کے ہدایتکار ہوانگ ڈونگ ہیوک کے مطابق اس بار کہانی انسانی امید، اخلاقیات اور مشکل فیصلوں کے گرد گھومتی ہے جس کو پہلے سے زیادہ بہتر انداز میں پیش کیا گیا ہے۔