تاجر برادری ملکی معیشت میں ریڑھ کی ہڈی کی حیثیت رکھتی ہے،کمشنر بہاولپور سے چیمبر آف کامرس کے وفد کی ملاقات

جمعرات 10 جولائی 2025 19:01

بہاولپور (اُردو پوائنٹ اخبارتازہ ترین - اے پی پی۔ 10 جولائی2025ء) کمشنر بہاولپور مسرت جبیں سے بہاولپور چیمبر آف کامرس اینڈ انڈسٹری کے وفد نے صدر سید ظفر شریف کی قیادت میں ملاقات کی۔وفد میں نائب صدر محمد اعظم قریشی،سابق صدرچوہدری عبد الجبار، ایگزیکٹو ممبرز محبوب ناصر چوہدری، عذرا محمود شیخ اور سیکرٹری جنرل سید عبیر حیدر شامل تھے۔ملاقات میں شہر میں تجارتی سرگرمیوں کے فروغ، صفائی و ستھرائی، انفراسٹرکچر اور تاجروں کو درپیش مسائل پر تفصیلی تبادلہ خیال کیا گیا۔

(جاری ہے)

کمشنر مسرت جبیں نے اس موقع پر کہا کہ تاجر برادری ملکی معیشت میں ریڑھ کی ہڈی کی حیثیت رکھتی ہے اور انتظامیہ تاجروں کے مسائل کو ترجیحی بنیادوں پر حل کرنے کے لیے ہر ممکن اقدامات کر رہی ہے۔ انہوں نے کہا کہ شہریوں کی فلاح و بہبود اور سہولت کے لیے کمشنر آفس کے دروازے ہر خاص و عام کے لیے ہمہ وقت کھلے ہیں۔وفد نے شہر میں صفائی و ستھرائی، ٹریفک مینجمنٹ، کاروباری سہولتوں میں بہتری سمیت دیگر امور پر اپنے تحفظات اور تجاویز پیش کیں۔ صدر چیمبر سید ظفر شریف نے ضلعی انتظامیہ کی کوششوں کو سراہتے ہوئے شہر کو بہتر اور کاروبار دوست ماحول فراہم کرنے کے لیے بھرپور تعاون کی یقین دہانی کرائی۔