ملائیشیا۔ پاکستان دوستی کے لازوال رشتوں سے منسلک ہے ، آئی سی سی آئی کی پیٹروناس کو پاکستان کے پیٹرولیم سیکٹر میں سرمایہ کاری کی دعوت

کوالالمپور (اُردو پوائنٹ اخبارتازہ ترین - اے پی پی۔ 30 اگست2025ء) اسلام آباد چیمبر آف کامرس اینڈ انڈسٹری (آئی سی سی آئی) کے اعلیٰ سطحی وفد نے کوالالمپور میں مشہور زمانہ پیٹروناس ٹاورز کا دورہ کیا ، پاکستان اور ملائیشیا کے درمیان توانائی کے شعبے میں باہمی تعاون کے فروغ پر تبادلہ خیال کیا۔ اس دورے کا اہتمام پاکستان میں ملائیشیا کے ہائی کمشنر داتو محمد اظہر بن مزلان نے کیا تھا۔

آئی سی سی آئی کی جانب سے ہفتہ کو جاری اعلامیہ کے مطابق داتو محمد اظہر بن مزلان نے کہا کہ ملائیشیا اور پاکستان کی دوستی ہر آزمائش پر پوری اتری ہے جس کی بنیاد باہمی اعتماد اور مشترکہ خوشحالی پر مبنی ہے۔ انہوں نے کہا کہ انھیں آئی سی سی آئی کی قیادت کا ملائیشیا کی فلیگ شپ کمپنیوں میں سے ایک پیٹروناس کے ساتھ تعلقات کے فروغ کا اقدام خوش آئند ہےاور یہ اقدام کاروباری تعاون کے نئے مواقع فراہم کرے گا اور ہمارے دوطرفہ اقتصادی تعلقات کو مزید مضبوط کرے گا۔

(جاری ہے)

آئی سی سی آئی کے سینئر نائب صدر عبدالرحمان صدیقی نے کہا کہ توانائی خصوصاً پٹرولیم جدید معیشتوں میں ریڑھ کی ہڈی کی حیثیت رکھتی ہے اور پاکستان کی تیزی سے بڑھتی ہوئی توانائی کی طلب بین الاقوامی سرمایہ کاروں کے لیے وسیع مواقع فراہم کرتی ہے۔ انہوں نے کہا کہ پیٹروناس نے پہلے بھی پاکستان کے توانائی کے شعبے میں کردار ادا کیا تھا۔ انہوں نے کمپنی کو پاکستان واپس آنے، اپنی موجودگی کو دوبارہ قائم کرنے اور ایکسپلوریشن، ریفائننگ، ایل این جی اور ڈاؤن سٹریم سہولیات میں نئے منصوبے تلاش کرنے کی دعوت بھی دی۔

انہوں نے اس بات پر زور دیا کہ پاکستان اصلاحات اور سرمایہ کار دوست پالیسیوں پر عمل پیرا ہے اور پٹرولیم اور توانائی کے شعبے کو عالمی کمپنیوں کے لیے انتہائی پرکشش بنایا جا رہا ہے۔ انہوں نے پیٹروناس انتظامیہ کو یقین دلایا کہ آئی سی سی آئی اور کاروباری برادری پاکستان میں کمپنی کے آپریشنز کو آسان بنانے کے لیے مکمل تعاون کریں گے۔آئی سی سی آئی کے نائب صدر ناصر محمود چوہدری نے کہا کہ پیٹروناس کی جانب سے تجدید کاری سے پاکستان اور ملائیشیا کے درمیان دوطرفہ تجارتی اور اقتصادی تعاون کو فروغ ملے گا جس سے ترقی کی نئی راہیں کھلیں گی، ٹیکنالوجی کے اشتراک اور روزگار کے مواقع پیدا ہوں گے۔

آئی سی سی آئی کے وفد میں کنوینئر ڈیلیگیشن کمیٹی عمران منہاس، کنوینئر آسیان کمیٹی چوہدری محمد علی اور بورڈ کے دیگر اراکین شامل تھے۔ اس موقع پر کوالالمپور میں پاکستانی ہائی کمیشن کی کمرشل کونسلر طاہرہ جاوید بھی موجودتھیں ۔