سبزی منڈی کی رہائشی خواتین کاگھر پر پولیس کی بلاجواز چڑھائی اور ایک عورت سمیت پانچ افراد کی گرفتاری کے خلاف احتجاجی مظاہرہ

جمعہ 11 جولائی 2025 21:10

حیدرآباد(اُردو پوائنٹ اخبارتازہ ترین - این این آئی۔ 11 جولائی2025ء)حیدرآباد مدینہ ٹائون سبزی منڈی کی رہائشی خواتین نے تین دن قبل گھر پر ہٹڑی پولیس کی بلاجواز چڑھائی اور ایک عورت سمیت پانچ افراد کی گرفتاری کے خلاف حیدرآباد پریس کلب پر حضور بانو کلہڑی اور دیگر کی قیادت میں احتجاجی مظاہرہ کیا، انہوں نے الزام لگایا کہ 11 جون 2025 کو رات 2 بجے کے قریب ہٹڑی تھانہ کی پولیس نے ایس ایچ او کی قیادت میں گھر پر چڑھائی کر کے سوئی ہوئی عورتوں اور بچوں کو تشدد کا نشانہ بنانے کے بعد میرے چار بیٹوں، شاہد کلہڑی، جان محمد کلہڑی، جاوید کلہڑی، عبدالرحمن کلہڑی اور میری بہو فرزانہ کو گرفتار کر لیا، انہوں نے الزام لگایا کہ پڑوسی اسامہ بروہی، فضل الرحمن بروہی، سراج بروہی نے ان کے خلاف بلاوجہ جھوٹا کیس درج کرایاہے اور حال ہی میں پولیس کو مبینہ رشوت دے کر گھر پر چڑھائی کروا کر عورت سمیت پانچ افراد کو ناحق گرفتار کرا دیا۔

(جاری ہے)