محکمہ زراعت کی کاشتکاروں کوجولائی کے دوسرے پندھرواڑے میں دھان کی بہتر پیداوار کیلئے محکمانہ سفارشات پر عملدرآمد کی ہدایت

پیر 14 جولائی 2025 14:56

فیصل آباد (اُردو پوائنٹ اخبارتازہ ترین - اے پی پی۔ 14 جولائی2025ء) محکمہ زراعت نے کاشتکاروں کوجولائی کے دوسرے پندھرواڑے میں دھان کی بہتر پیداوار کےلئے محکمانہ سفارشات پر عملدرآمد کی ہدایت کی ہے۔ نظامت زرعی اطلاعات محکمہ زراعت کے ترجمان نے کہا کہ دھان کی فصل ہر قسم کی زمین میں کاشت کی جاسکتی ہے سوائے ریتلی زمینوں کے جہاں پانی کھڑا نہ ہو سکے۔

انہوں نے کہا کہ دھان کی منظور شدہ موٹی اقسام نبجی جی ایس آر6،نبجی جی ایس آر 7،نبجی جی ایس آر 8 اور ایس کے سی 32-5-370وغیرہ کی پنیری کی منتقلی کا وقت 25 جولائی ہے جبکہ باسمتی فائن اقسام میں سپر باسمتی، باسمتی - 515، سپر گولڈ، باسمتی 2019، پی کے 1121 ایر ومیٹک، پی کے 2021 ایرو میٹک،نیاب سپر، این بی آر 2،نبجی باسمتی 2020، چناب باسمتی، پنجاب باسمتی، نیاب باسمتی 2016،نور باسمتی، پی کے 386، پی کے 10029 (وائٹل سپر ہاستی)، پی کے 10436 (سونا پر باسمتی)، نیاب ایس 39، نیاب ایچ ٹی ٹی 18، گارڈ 101وغیرہ اورکسان باسمتی کی پنیری کی منتقلی کا وقت بھی 25 جولائی تک ہے۔

(جاری ہے)

انہوں نے کہا کہ کاشتکارچاول کی اچھی پیداوار کے لیے کھیت میں پنیری منتقل کرنے سے پہلے 10 تا 15 دن تک پانی کھڑا رکھیں اور پھر کدو کریں جبکہ پانی کی کمی کی صورت میں کدو کرنے کے لیے کھیت میں 7 دن تک پانی کھڑا کریں اور پانی کی شدید کمی کی صورت میں3 دن تک پانی کھڑا رکھیں اور کدو کریں نیز دھان کی بہترین پیداوار کے حصول کے لیے زمین کو اچھی طرح ہموار کریں۔

انہوں نے کہا کہ پودوں کی فی ایکڑ تعداد 1 لاکھ 60 ہزار رکھیں یعنی پودوں اور لائنوں کا باہمی فاصلہ 9 انچ رکھتے ہوئے 80 ہزار سوراخوں میں فی سوراخ 2 پودے لگائیں۔انہوں نے کہا کہ زنک کی کمی دور کرنے کے لیے جو کاشتکار پنیری میں زنک سلفیٹ استعمال نہیں کر سکے وہ لاب لگانے کے 10 دن بعد تک 33 فیصد والا زنک سلفیٹ 6 کلو گرام یا 27 فیصد والا ز نک سلفیٹ 7.5 کلوگرام یا 21 فیصد والا زنک سلفیٹ 10 کلوگرام فی ایکڑڈالیں۔