Live Updates

کمشنر سرگودھا کا چینی کے سرکاری نرخوں پر عملدرآمد یقینی بنانے کا حکم

جمعرات 17 جولائی 2025 21:10

سرگودھا (اُردو پوائنٹ اخبارتازہ ترین - اے پی پی۔ 17 جولائی2025ء) کمشنر سرگودہا ڈویژن جہانزیب اعوان نے چاروں اضلاع سرگودھا، خوشاب، میانوالی اور بھکر کے ڈپٹی کمشنرز کو ہدایت جاری کی ہے کہ حکومت پنجاب کی جانب سے چینی کے نرخوں سے متعلق جاری کردہ نوٹیفکیشن پر سختی سے عملدرآمد یقینی بنایا جائے۔

(جاری ہے)

واضح رہے کہ حکومت پنجاب کے محکمہ خوراک و کین کی جانب سے چینی کے نرخ مقرر کیے جا چکے ہیں، جن کے مطابق 15جولائی سے ایکس مل قیمت 165 روپے فی کلو اور ریٹیل قیمت 173 روپے فی کلو،15 اگست سے ایکس مل قیمت 167 روپے فی کلو اور ریٹیل قیمت 175 روپے فی کلو ،15ستمبر سے ایکس مل قیمت 169 روپے فی کلو اور ریٹیل قیمت 177 روپے فی کلو، 15اکتوبر سے ایکس مل قیمت 171 روپے فی کلو اور ریٹیل قیمت 179 روپے فی کلو مقرر کی گئی ہے۔

کمشنر نے ضلعی انتظامیہ، پرائس کنٹرول مجسٹریٹس اور متعلقہ افسران کو سختی سے ہدایت کی کہ مارکیٹ میں چینی کی فروخت ان ہی سرکاری نرخوں پر یقینی بنائی جائے اور خلاف ورزی کرنے والوں کے خلاف بلاامتیاز کارروائی عمل میں لائی جائے۔کمشنر سرگودہا نے کہا کہ مصنوعی مہنگائی اور ذخیرہ اندوزی کسی صورت برداشت نہیں کی جائے گی اور عوام کو ریلیف فراہم کرنے کے لیے حکومت کے تمام احکامات پر عملدرآمد ہر صورت یقینی بنایا جائے گا۔