بہاولپور،فاطمہ جناح ویمن لیڈرشپ سنٹر کے اشتراک سے یوتھ سکلز ڈے کی مناسبت سے سیمینار

پیر 21 جولائی 2025 18:04

بہاول پو ر (اُردو پوائنٹ اخبارتازہ ترین - اے پی پی۔ 21 جولائی2025ء) اسلامیہ یونیورسٹی بہاولپور کے شعبہ انفارمیشن مینجمنٹ نے ایس ڈی جیز کولیبریشن سنٹر اور فاطمہ جناح ویمن لیڈرشپ سنٹر کے اشتراک سے یوتھ سکلز ڈے کی مناسبت سے سیمینار کا انعقاد کیا۔ تقریب کی صدارت پروفیسر ڈاکٹر روبینہ بھٹی ڈین فیکلٹی آف سوشل سائنسز نے کی، جنہوں نے ڈیجیٹل دور میں ترقی کی منازل طے کرنے اور پائیدار ترقی کے اہداف میں بامعنی کردار ادا کرنے کے لیے نوجوان نسل کو تکنیکی صلاحیتوں سے آراستہ کرنے کی بڑھتی ہوئی ضرورت پر زور دیا۔

پینل کے ماہرین میں چیئرمین شعبہ انفارمیشن مینجمنٹ پروفیسر ڈاکٹر سلمان بن نعیم ، اسسٹنٹ پروفیسر شعبہ لائبریری اینڈ انفارمیشن سائنس ڈاکٹر غالب خان ، یونیورسٹی آف کرک خوشحال خان خٹک ، ڈاکٹر شکیل احمد خان، ایسوسی ایٹ پروفیسر ڈاکٹر ماہ بشریٰ اصغر، ایسوسی ایٹ پروفیسر،ڈاکٹر محمد یوسف ایسو سی ایٹ پروفیسر، ڈاکٹر حافظ محمد شفیق، شعبہ انفارمیشن مینجمنٹ شامل تھے۔

(جاری ہے)

مقررین نے اجتماعی طور پر مستقبل کے چیلنجوں کے لیے نوجوانوں کو بااختیار بنانے میں مصنوعی ذہانت اور ڈیجیٹل صلاحیتوں کے اہم کردار پر روشنی ڈالی۔ انہوں نے ڈیجیٹل تقسیم کو ختم کرنے اور جامع، اختراعی اور اقتصادی طور پر پائیدار معاشروں کی تشکیل کے لیے ڈیجیٹل خواندگی کو بڑھانے کی ضرورت پر زور دیا۔ تقریب میں طلباء، فیکلٹی ممبران، اور نوجوان رہنماؤں کی ایک بڑی تعداد نے شرکت کی جنہوں نے انٹرایکٹو مباحثوں میں بڑھ چڑھ کر حصہ لیا۔

شرکاء نے کیریئر کی ترقی، انٹرپرینیورشپ، اور سماجی اختراع کے لیے مصنوعی ذہانت اور ڈیجیٹل ٹیکنالوجیز کے ذریعے فراہم کردہ مواقع کے بارے میں جوش و خروش کا اظہار کیا۔ یہ تعاون پر مبنی اقدام تعلیم اور تحقیق کے ذریعے قیادت، تکنیکی ترقی، اور پائیدار ترقی کو فروغ دینے کے لیے یونیورسٹی کے مسلسل عزم کی عکاسی کرتا ہے۔