اگست سے اکتوبر تک کا عرصہ شجرکاری کیلئے موزوں ترین ہے،ڈاکٹر مصدق ملک

مون سون موسم سے زیادہ سے زیادہ فائدہ اٹھانے کیلئے شجر کاری تیاریاں بروقت مکمل کی جائیں، وفاقی وزیر موسمیاتی تبدیلی

پیر 21 جولائی 2025 21:20

اسلام آباد (اُردو پوائنٹ اخبارتازہ ترین - این این آئی۔ 21 جولائی2025ء) وفاقی وزیر موسمیاتی تبدیلی ڈاکٹر مصدق ملک نے کہا ہے کہ اگست سے اکتوبر تک کا عرصہ شجرکاری کیلئے موزوں ترین ہے،مون سون موسم سے زیادہ سے زیادہ فائدہ اٹھانے کیلئے شجر کاری تیاریوں کو بروقت مکمل کیا جائے۔پیر کو وفاقی وزیر موسمیاتی تبدیلی و ماحولیاتی ہم آہنگی مصدق ملک کی زیر صدارت مون سون شجرکاری مہم سے متعلق اعلی سطحی کمیٹی کا اجلاس منعقد ہوا۔

اجلاس کا مقصد آئندہ قومی شجرکاری مہم کے لیے حکمت عملی اور بین الادارہ جاتی روابط کو حتمی شکل دینا تھا۔اجلاس میں سیکریٹری وزارتِ موسمیاتی تبدیلی و ماحولیاتی ہم آہنگی محترمہ عائشہ حمیرا مورانی، سیکریٹری بین الصوبائی رابطہ محمد یدین احمد وانی، اراکین قومی اسمبلی زہرہ فاطمی اور صبا صادق سمیت متعلقہ محکموں کے اعلی افسران اور اسٹیک ہولڈرز نے شرکت کی۔

(جاری ہے)

اجلاس میں وفاقی دارالحکومت اور تمام صوبوں میں شجرکاری کے جامع منصوبے کا جائزہ لیا گیا۔ اس ضمن میں اسکولوں، طلبہ، سرکاری اداروں اور عوام الناس کو مہم میں بھرپور طور پر شریک کرنے پر زور دیا گیا۔ ڈاکٹر مصدق ملک نے کہا کہ اگست سے اکتوبر تک کا عرصہ شجرکاری کے لیے موزوں ترین ہے، لہٰذا تیاریوں کو بروقت مکمل کیا جائے تاکہ مون سون کے موسم سے زیادہ سے زیادہ فائدہ اٹھایا جا سکے۔اجلاس میں پودوں کی مفت فراہمی کے طریقہ کار پر بھی غور کیا گیا تاکہ زیادہ سے زیادہ افراد شجرکاری میں حصہ لے سکیں۔ اس بات پر زور دیا گیا کہ صرف مقامی اور موسمی حالات سے ہم آہنگ اقسام کے پودے لگائے جائیں تاکہ ماحول پر مثبت اثرات مرتب ہوں اور ماحولیاتی توازن متاثر نہ ہو۔