پسرورپولٹری فارمرز کو مرغیوں کو مون سون کے دوران بیماریوں سے بچانے کےلئے احتیاطی تدابیر پر عملدرآمد یقینی بنانے کی ہدایت

بدھ 23 جولائی 2025 17:10

سیالکوٹ (اُردو پوائنٹ اخبارتازہ ترین - اے پی پی۔ 23 جولائی2025ء) ڈپٹی ڈائریکٹر لائیو سٹاک و ڈیری ڈویلپمنٹ پسرور ڈاکٹر عقیل سہیل نے پولٹری فارمرز کو مرغیوں کو مون سون کے دوران بیماریوں سے بچانے کےلئے شیڈز کی صفائی، پانی کے سپرے اور شیڈ کو خشک رکھتے ہوئے احتیاطی تدابیر پر عملدرآمد یقینی بنانے کی ہدایت کی ہے۔ انہوں نے کہا کہ بارشوں کی شدت کے باعث مرغیوں میں مختلف بیماریاں پیداہونے کا خدشہ ہوتاہے، اگر شیڈز میں موجودمرغیاں سست اور نڈھال ہونے کے ساتھ ساتھ خوراک کم کھائیں اور ان کی چونچ، ناک، آنکھ سے لیس دار مادے کا اخراج محسوس ہو تو یہ رانی کھیت کی بیماری کی علامات ہیں، اگر مرغیاں سبزی مائل پیچش کے علاوہ انڈوں کی پیداوار میں کمی کریں تو یہ سانس کی بیماری کی علامات کاحصہ ہے۔

(جاری ہے)

انہوں نے کہاکہ پولٹری فارمرز فوری طور پر شیڈز کی صفائی یقینی بنائیں اور شیڈ کو خشک رکھیں تاکہ صاف ماحول اور صفائی کے باعث مرغیوں کو بیماریوں سے بچایا جا سکے۔انہوں نے کہا کہ مرغی پال حضرات اور پولٹری فارمرز کسی بھی مسئلہ کی صورت میں فوری قریبی ویٹرنری ہسپتال، ویٹرنری ڈسپنسریز، محکمہ لائیو سٹاک کے موبائل یونٹس اور ماہرین لائیو سٹاک کی خدمات سے بھی استفادہ کرسکتے ہیں۔ انہوں نے بتایا کہ اس ضمن میں محکمہ لائیو سٹاک کی فری ہیلپ لائن سے بھی رہنمائی حاصل کی جاسکتی ہے۔