روسی طیارہ حادثے کا شکار؛ ملبہ مل گیا‘ تمام مسافروں کی ہلاکت کا خدشہ

جہاز چین کی سرحد سے متصل روسی علاقے میں منزل کے قریب پہنچتے ہوئے اچانک ہی ریڈار سے غائب ہوگیا تھا

ساجد علی جمعرات 24 جولائی 2025 11:52

روسی طیارہ حادثے کا شکار؛ ملبہ مل گیا‘ تمام مسافروں کی ہلاکت کا خدشہ

ماسکو ( اُردو پوائنٹ اخبارتازہ ترین۔ 24 جولائی 2025ء ) روس کا ایک مسافر 50 سے زائد افراد سمیت طیارہ حادثے کا شکار ہوگیا۔ عالمی نیوز ایجنسی رائٹرز کے مطابق روس کا طیارہ تقریباً 50 مسافروں کے ساتھ ملک کے مشرق میں لاپتہ ہوا، علاقائی گورنر نے بتایا کہ جمعرات کو روس کے مشرق بعید میں ایئر ٹریفک کنٹرولرز کا رابطہ A24 مسافر طیارے سے اچانک منقطع ہوگیا جس میں تقریباً 50 افراد سوار تھے۔

بتایا گیا ہے کہ حادثے کے فوری بعد لاپتہ ہونے والے بدقسمت طیارے کی تلاش شروع کردی گئی جس کے نتیجے میں روس کے شہر ٹائنڈا سے تقریباً 15 کلومیٹر دور لاپتہ مسافر طیارے کا ملبہ مل گیا تاہم حکام نے حادثے میں تمام مسافروں کی ہلاکت کا خدشہ ظاہر کیا ہے۔

(جاری ہے)

اس حوالے سے مقامی ہنگامی صورتحال کی وزارت نے بتایا کہ سائبیریا سے تعلق رکھنے والی انگارا نامی ایئرلائن کے زیرانتظام طیارہ چین کی سرحد سے متصل امور نامی روسی علاقے کے ایک قصبے ٹائنڈا میں منزل کے قریب پہنچتے ہوئے اچانک ہی ریڈار سے غائب ہوگیا، ابتدائی اطلاعات سے پتا چلا ہے کہ جہاز میں 5 بچوں سمیت 43 مسافر اور عملے کے 6 افراد سوار تھے، حادثے کے بعد تمام ضروری فورسز اور ذرائع کو طیارے کی تلاش کے لیے تعینات کیا گیا جس کے نتیجے میں ملبہ ڈھونڈنے میں کامیابی حاصل ہوئی تاہم کسی بھی مسافر کے زندہ بچنے کی امید نہیں ہے۔