ٹیلرسوئفٹ کے 13مومی مجسمے نصب، ایراز ٹور کے مشہور انداز کو خراجِ تحسین

جمعرات 24 جولائی 2025 22:48

نیو یارک (اُردو پوائنٹ اخبارتازہ ترین - این این آئی۔ 24 جولائی2025ء)امریکی گلوکارہ ٹیلر سوئفٹ کے اعزاز میں معروف ویکس میوزیم مادام تسائو نے 13نئے ویکس مجسمے نصب کئے ہیں، یہ مجسمے ٹیلر سوئفٹ کے مشہور ایراز ٹور کے مختلف انداز اور ملبوسات سے متاثر ہیں۔یہ پہلا موقع ہے کہ مادام تسائو نے بیک وقت اتنی بڑی تعداد میں ایک ہی شخصیت کے مومی مجسمے دنیا کے مختلف شہروں میں پیش کیے ہوں، ان مجسموں کو 23جولائی کو لانچ کیا گیا، جو 4براعظموں کے 13شہروں میں رکھے گئے ہیں۔

(جاری ہے)

لندن اور بلیک پول میں 2مجسمے برطانیہ کی نمائندگی کریں گے، جبکہ باقی مجسمے ایمسٹرڈیم، برلِن، بڈاپیسٹ، ہالی ووڈ سمیت دیگر شہروں کے میوزیم میں رکھے جائیں گے۔ مادام تسائو کی گلوبل برانڈ ڈائریکٹر لارا شیئرڈ نے اس موقع پر کہا کہ ٹیلر سوئفٹ نئی نسل کی نمائندہ اور ثقافت پر گہرا اثر ڈالنے والی شخصیت ہیں، وہ موسیقی، فیشن، فلم، سماجی شعور اور معیشت تک میں نمایاں کردار ادا کر رہی ہیں۔انہوں نے کہا کہ ایراز ٹور کی شاندار کامیابی کے بعد یہ بالکل مناسب وقت تھا کہ ہم ان کے یادگار انداز کو ویکس مجسموں کی شکل میں محفوظ کریں۔ 13ٹیلر کا لکی نمبر بھی ہے، اس لئے ہم نے 13مجسمے دنیا بھر میں نصب کیے تاکہ زیادہ سے زیادہ مداح ان سے لطف اندوز ہو سکیں۔