محکمہ لائیو سٹاک کی موسم برسات کے دوران مویشیوں کو خشک چارے اور متوازن خوراک کی فراہمی کی ہدایت

جمعہ 25 جولائی 2025 13:42

فیصل آباد (اُردو پوائنٹ اخبارتازہ ترین - اے پی پی۔ 25 جولائی2025ء) محکمہ لائیو سٹاک و ڈیری ڈویلپمنٹ نے موسم برسات کے دوران مویشیوں کو مختلف بیماریوں سے بچانے کیلئے خشک چارے اور متوازن خوراک انمول ونڈے کی فراہمی کی ہدایت کی ہے اور کہا ہے کہ موسم برسات میں مویشیوں کی خصوصی دیکھ بھال کو یقینی بنایا جائے تاکہ لائیوسٹاک فارمرز کو بعد ازاں کسی قسم کی پریشانی کا سامنا نہ کرنا پڑے۔

محکمہ لائیو سٹاک وڈیری ڈویلپمنٹ فیصل ۱ٓباد کے ڈویژنل ڈائریکٹر ڈاکٹر سید ندیم بدر نے اے پی پی کو بتایاکہ موسم برسات میں جانوروں کی رہائش کیلئے خشک جگہ کا بندو بست بھی ضروری ہے۔انہوں نے بتایا کہ سیلابی صورتحال اورموسم برسات کے دوران کسی بھی نا خوشگوار صورتحال سے نمٹنے کیلئے محکمہ لائیو سٹاک نے تمام ویٹرنری ہسپتالوں اور ڈسپنسریز میں وافر مقدار میں ضروری ادویات فراہم کر رکھی ہیں۔

(جاری ہے)

انہوں نے مویشی پال حضرات سے کہا کہ وہ مویشیوں کو موسمی شدت کے اثرات سے بچانے کیلئے متوازن غذا کااستعمال کر وانے کے ساتھ ساتھ انہیں بیماریوں سے بچاؤ کیلئے حفاظتی ٹیکے ضرور لگوائیں۔انہوں نے کہا کہ ونڈہ،منرل مکسچر، یوریا مولیسز بلاک رعایتی نرخوں پر دستیاب ہیں اور منرل مکسچر میں تمام ضروری نمکیات علاقائی ضرورت کے مطابق موجود ہیں۔