کراچی: سگ گزیدگی کے واقعات میں خطرناک حد تک اضافہ، یومیہ 90سے 100کیس رپورٹ

منگل 29 جولائی 2025 17:18

کراچی(اُردو پوائنٹ اخبارتازہ ترین - این این آئی۔ 29 جولائی2025ء)کراچی میں کتے کے کاٹے (سگ گزیدگی)کے واقعات میں خطرناک حد تک اضافہ ہوگیا، جون اور جولائی میں کتوں کی جانب سے بچوں کو کاٹنے کے سب سے زیادہ کیسز رپورٹ ہوئے ہیں۔رپورٹ کے مطابق کراچی میں جون اور جولائی کے دوران سگ گزیدگی کے واقعات میں خطرناک حد تک اضافہ دیکھا گیا ہے، ڈاکٹرز کے مطابق اس عرصے میں سول ہسپتال میں سگ گزیدگی کے 2 ہزار 29 کیس رپورٹ ہوئے ہیں، جناح ہسپتال میں ایک ہزار 392 مریض لائے گئے۔

(جاری ہے)

ڈاکٹرز کے مطابق سگ گزیدگی کے زیادہ تر واقعات نارتھ کراچی، سرجانی اور بلدیہ ٹائون سے رپورٹ ہوئے ہیں، کتے کے کاٹنے کے 24 گھنٹے کے اندر ویکیسن لگوانا ضروری ہے۔انچارج ریبیز اینڈ ڈاگ بائیٹ سول ہسپتال ڈاکٹر رومانہ کے مطابق زیادہ تر کیسز کا تعلق بلدیہ ٹائون، سرجانی اور نارتھ کراچی سے ہے، سول ہسپتال میں یومیہ 60 سے 70 کیسز رپورٹ ہو رہے ہیں، جناح اسپتال میں یومیہ 20 سے 30 افراد کو لایا جا رہا ہے۔ڈاکٹر رومانہ نے کہا کہ سول ہسپتال میں ریبیز کا کنفرم کیس کوئی رپورٹ نہیں ہوا، کتے کے کاٹنے کے 24 گھنٹے کے اندر ویکیسن لگوائی جائے ورنہ ریبیز کا خطرہ ہوسکتا ہے۔