متحدہ عرب امارات، پولیس نے ڈائمنڈ جیولری سے بھرا بیگ اصل مالک کو واپس کردیا

بدھ 30 جولائی 2025 09:10

دبئی (اُردو پوائنٹ اخبارتازہ ترین - اے پی پی۔ 30 جولائی2025ء) متحدہ عرب امارات میں دبئی پولیس نے زیورات سے بھرا بیگ بازیاب کرکے اس کے اصل مالک کو واپس کردیا جو ایک مسافر غلطی سے بنگلہ دیش لے گیا تھا۔الامارات الیوم کے مطابق بیگ میں قیمتی ڈائمنڈ جڑے زیورات تھے جس کی مالیت 1.1 ملین درھم ہے۔ دبئی میں مقیم ایک جیولر نمائش میں شرکت کے لیے خلیجی ملک گیا اس کے پاس 4 بیگ تھے جن میں قیمتی ہیرے کے زیورات موجود تھے تاہم منزل پر پہنچنے پر جیولر یہ دیکھ کر حیران رہ گیا کہ اس کے پاس موجود چار میں سے ایک بیگ اس کا نہیں ہے۔

(جاری ہے)

جیولر نے فوری طور پر اسی دن دبئی واپس آکر جنرل ڈیپارٹمنٹ آف ایئرپورٹ سکیورٹی میں واقعے کی رپورٹ درج کرائی۔ ایک خصوصی تفتیشی ٹیم تشکیل دی گئی۔ پتہ چلا کہ سکیورٹی چیکنگ کے دوران ایک بنگلہ دیشی مسافر نے غلطی سے جیولر کا بیگ مشابہت کی وجہ سے اٹھا لیا اور اسے بنگلہ دیش لے گیا۔ دبئی پولیس کے کریمنل انویسٹی گیشن ڈیپارٹمنٹ نے فوری طور پر وزارت خارجہ، بنگلہ دیشی حکام اور ڈھاکا میں موجود اماراتی سفارتخانے سے رابطہ کیا۔ان کوششوں سے بیگ کو کامیابی سے تلاش کرک اصل مالک کے حوالے کردیا گیا۔