وژن 2030 کے تحت سمارٹ مکہ ہیکاتھون انیشیٹو کا آغاز

بدھ 30 جولائی 2025 15:09

ریاض (اُردو پوائنٹ اخبارتازہ ترین - اے پی پی۔ 30 جولائی2025ء) مکہ مکرمہ و مشاعر مقدسہ رائل کمیشن نے سرکاری و نجی شعبے کے تعاون سے مملکت کے وژن 2030 کے اہداف کے تحت سمارٹ مکہ ہیکاتھون اقدام کا آغاز کر دیا ہے۔اردو نیوز کے مطابق اقدام کا مقصد مصنوعی ذہانت اور جدید ٹیکنالوجی کے استعمال کو بہتر بناتے ہوئے رہائشیوں اور زائرین کو بہتر سے بہتر خدمات فراہم کرنا ہے۔

(جاری ہے)

رائل کمیشن اتھارٹی نے کہا کہ یہ اقدام مختلف مراحل پر مشتمل ہو گا جس کا ابتدائی مرحلہ مصنوعی ذہانت کے پروگراموں کی تربیت فراہم کرنا ہے تاکہ سمارٹ سلوشنز کو جلد قابل عمل بنایا جائے۔سمارٹ مکہ ہیکاتھون کے حوالے سے اتھارٹی نے بتایا کہ رواں سال میں مکہ مکرمہ کی مختلف شہری ترقی کی ترجیحات کی عکاسی کی جائے گی جن میں سرفہرست شہری منصوبہ بندی شامل ہے۔

سمارٹ تکنیکی صلاحیتوں کو بروئے کار لاتے ہوئے خاص کر مختلف سیزن (عمرہ اور حج ) میں شہری امور کو آسان بنانے کے لیےجامع منصوبوں کو پیش کیا جائے گا۔اتھارٹی نے یقین دہانی کی کہ ہیکاتھون منفرد افکار و آرا کو پیش کرنے کا اوپن پلیٹ فارم ہوگا جن پرعمل کرتے ہوئے مستقبل کے تقاضوں سے ہم آہنگ بہترین سہولیات کی فراہمی کو یقینی بنایا جا سکے۔