جمشید دستی نا اہلی کیس،لاہور ہائیکورٹ نے این اے 175 مظفرگڑھ کا انتخابی شیڈول معطل

جمعہ 1 اگست 2025 10:20

لاہور (اُردو پوائنٹ اخبارتازہ ترین - اے پی پی۔ 01 اگست2025ء) لاہور ہائیکورٹ نے سابق رکن قومی اسمبلی جمشید دستی کی الیکشن کمیشن کی طرف سے نااہلی کے خلاف دائر درخواست پر تحریری حکم جاری کرتے ہوئے قومی اسمبلی کے حلقہ این اے 175 مظفرگڑھ کا انتخابی شیڈول معطل کر دیا۔چیف جسٹس لاہور ہائیکورٹ جسٹس مس عالیہ نیلم کی سربراہی میں تین رکنی بینچ نے جمعہ کو گزشتہ سماعت کا تحریری حکم نامہ جاری کردیا ۔

(جاری ہے)

تحریری حکم کے مطابق عدالت نے الیکشن کمیشن آف پاکستان کی جانب سے 14 جولائی کو جاری کردہ انتخابی شیڈول کا نوٹیفکیشن معطل کر دیا ہے۔ عدالت نے قرار دیا کہ درخواست میں اہم قانونی نکات اور عدالتی دائرہ اختیار کے حوالے سے سوالات اٹھائے گئے ہیں۔ عدالت نے الیکشن کمیشن کو نوٹس جاری کرتے ہوئے اٹارنی جنرل کو آئین کے آرٹیکل 27 اے کے تحت نوٹس بھی جاری کیا ہے۔عدالت نے مزید سماعت 10 ستمبر تک ملتوی کر دی ہے۔