شہید بینظیرآباد کے سرکاری اداروں میں معرکہ حق اور یومِ آزادی کی تقریبات کا سلسلہ جاری

پیر 4 اگست 2025 17:29

حیدرآباد (اُردو پوائنٹ اخبارتازہ ترین - اے پی پی۔ 04 اگست2025ء) شہید بینظیرآباد کے سرکاری اداروں میں’’ معرکہ حق‘‘ اور یومِ آزادی کی تقریبات کا سلسلہ جاری ہے۔ اسی سلسلے میں گورنمنٹ ڈگری کالج دولت پور کی جانب سے کالج کے پرنسپل پروفیسر ارشاد احمد اوٹھو کی قیادت میں پاک فوج کی معرکہ حق میں کامیابی کی خوشی اور یومِ آزادی کے سلسلے میں ریلی نکالی گئی جس میں کالج کے درجنوں طلبہ نے شرکت کی،شرکا نے ہاتھوں میں قومی پرچم اٹھا رکھے تھے اور ’’پاکستان زندہ باد‘‘ کے نعرے لگائے۔

ریلی کالج سے مرکزی لائبریری تک نکالی گئی۔

(جاری ہے)

ریلی میں کالج کے لیکچرار شہباز علی داہری، شاہد نواز سومرو، نصیر سکندر سمیت کالج کے اساتذہ، طلبہ اور شہریوں نے بھرپور شرکت کی۔ریلی کے اختتام پر کالج کے پرنسپل پروفیسر ارشاد احمد اوٹھو اور دیگر مقررین نے کہا کہ ضلع شہید بینظیرآباد میں ’’معرکہ حق ‘‘ اور یومِ آزادی کے سلسلے میں مختلف پروگرامز ترتیب دیئے گئے ہیں جن کا مقصد پاک فوج کی قربانیوں اور عزم کو خراجِ تحسین پیش کرنا ہے۔انہوں نے مزید کہا کہ پاک فوج ہمارے ملک کی سلامتی کی علامت ہے، ہم سب کا فرض ہے کہ ان کی قربانیوں کو یاد رکھیں، اپنے اندر حب الوطنی پیدا کریں اور ہر سطح پر وطن سے وفاداری کا مظاہرہ کریں۔