کپاس کے کاشتکار سفید مکھی کے خلاف مؤثر کنٹرول کیلئے ہالوکون نوزل سے سپرے کریں،محکمہ زراعت

بدھ 6 اگست 2025 16:32

فیصل آباد (اُردو پوائنٹ اخبارتازہ ترین - اے پی پی۔ 06 اگست2025ء) ڈائریکٹر محکمہ زراعت توسیع فیصل آباد چوہدری خالد محمود نے کہا کہ کپاس کے کاشتکار سفید مکھی کے خلاف مؤثر کنٹرول کیلئے ہالوکون نوزل سے سپرے کریں ۔ انہوں نے کہاکہ فصل کا باقاعدگی سے معائنہ جاری رکھیں اورسفید مکھی کے حملہ کی صورت میں معاشی نقصان کی حد پانچ بالغ یا بچے فی پتہ یا دونوں ملا کر پانچ فی پتہ ہوں تو محکمہ زراعت کے مقامی زرعی ماہرین کے مشورہ سے سفارش کردہ زہر کا سپرے کریں۔

(جاری ہے)

انہوں نے کاشتکاروں کو آگاہ کیا کہ سفید مکھی کپاس کی فصل کا رس چوسنے والا انتہائی خطر ناک کیڑا ہے جو پتہ مروڑ وائرس کو پھیلانے کا ذریعہ بنتا ہے لہٰذا کاشتکار سفید مکھی کے تدارک کیلئے احتیاطی تدابیر پر عمل کریں نیز کاشتکاروں کو چاہیے کہ کھالوں پر موجود جڑ ی بوٹیوں کی تلفی کیلئے زہر پاشی کریں کیونکہ کھالوں کے نزدیک سفید مکھی کا حملہ زیادہ ہوتا ہے اسلئے وہاں وقفے وقفے سے سپرے کرنا ضروری ہے۔انہوں نے کہاکہ کاشتکار کپاس کے ایسے پتے جن پر سفید مکھی کا حملہ شدید ہو تو انہیں توڑ کر پانی میں ڈبودیں نیز بالغ اور بچے ہمہ وقت فصل پر موجودہوں تو سپرے کے لیے ایسی زہر کا انتخاب کریں جو ان دونوں کے خلاف مؤثر ہو۔ انہوں نے کہاکہ ایک ہی زہر کا باربار سپرے نہ کیاجائے۔