ڈپٹی کمشنر راولپنڈی کی تمام یونین کونسلز میں سویپنگ، فوگنگ اور ڈینگی سرویلنس کے عمل کو باقاعدگی اور تسلسل سے یقینی بنانے کی ہدایت

بدھ 6 اگست 2025 17:59

راولپنڈی (اُردو پوائنٹ اخبارتازہ ترین - اے پی پی۔ 06 اگست2025ء) ڈپٹی کمشنر راولپنڈی ڈاکٹر حسن وقار چیمہ نےتمام یونین کونسلز میں سویپنگ، فوگنگ اور ڈینگی سرویلنس کے عمل کو باقاعدگی اور تسلسل سے یقینی بنانے کی ہدایت کی ہے تاکہ ڈینگی مچھر کی افزائش کو روکا جا سکے۔ انہوں نے واضح کیا کہ کل سے انسدادِ ڈینگی اقدامات کا روزانہ جائزہ لینے کے لیے رات کو بھی ڈسٹرکٹ ایمرجنسی رسپانس کمیٹی کا اجلاس کمیٹی روم میں منعقد ہوگا۔

ڈپٹی کمشنر نے یہ ہدایات روزانہ کی بنیاد پر منعقدہ انسدادِ ڈینگی اجلاس کی صدارت کے دوران دیں۔ انہوں نے بعض علاقوں میں سویپنگ میں غفلت پر متعلقہ ایریاز کے ڈی ڈی ایچ اوز کو شوکاز نوٹسز بھی جاری کرنے کی ہدایت کی۔اجلاس میں ڈسٹرکٹ ایمرجنسی رسپانس کمیٹی کے کوآرڈینیٹر ڈاکٹر سجاد احمد نے ضلع بھر میں جاری انسداد ڈینگی اقدامات پر تفصیلی بریفنگ دی۔

(جاری ہے)

ڈپٹی کمشنر نے تمام اقدامات کا باریک بینی سے جائزہ لیا اور جن علاقوں میں کوتاہی پائی گئی وہاں فوری اصلاحی احکامات جاری کیے۔بعد ازاں، انہوں نے تمام اسسٹنٹ کمشنرز کو ہدایت کی کہ ایس او پیز کی خلاف ورزی کرنے والے افسران کے خلاف کارروائی عمل میں لائی جائے اور ضرورت پڑنے پر ان کے دفاتر کو سیل کیا جائے۔ڈپٹی کمشنر نے مزید ہدایت کی کہ انسدادِ ڈینگی کی کارکردگی کو ہر ہفتے میڈیا کے ذریعے عوام کے سامنے لایا جائے تاکہ عوامی آگاہی کے ساتھ ساتھ محکموں کی شفافیت اور جوابدہی کو بھی یقینی بنایا جا سکے۔