آن لائن خریداری پر نئے سیلز ٹیکس کے نفاذ کا قانون نافذ کر دیا گیا

ڈیجیٹل آرڈرز پر مارکیٹ پلیس، کوریئر، پیمنٹ ایجنٹس سیلز ٹیکس کاٹنے کے پابند ہوں گے، کیش آن ڈلیوری پر بھی سیلز ٹیکس کی کٹوتی لازم قرار دی گئی

محمد علی جمعہ 8 اگست 2025 19:35

لاہور (اُردو پوائنٹ اخبارتازہ ترین۔ 08 اگست2025ء) آن لائن خریداری پر نئے سیلز ٹیکس کے نفاذ کا قانون نافذ کر دیا گیا۔ تفصیلات کے مطابق ایف بی آر نے آن لائن آرڈرز پر نئے سیلز ٹیکس قانون کا نفاذ کر دیا، جس کا نوٹیفکیشن بھی جاری کر دیا گیا ہے۔ نوٹیفکیشن کے مطابق ڈیجیٹل آرڈرز پر مارکیٹ پلیس، کوریئر، پیمنٹ ایجنٹس سیلز ٹیکس کاٹنے کے پابند ہوں گے، کیش آن ڈلیوری پر بھی سیلز ٹیکس کی کٹوتی لازم قرار دی گئی ہے۔

(جاری ہے)

ایف بی آر کے مطابق آن لائن پلیٹ فارمز کو ہر ماہ 10 تاریخ تک ایس ٹی آر فارم جمع کروانا ہوگا، کوریئرز اور پیمنٹ ایجنٹس بھی ایس ٹی آر فارم ایف بی آر کو جمع کرائیں گے۔ نوٹیفکیشن کے مطابق آن لائن مارکیٹ پلیس کو ایس ٹی آر 34 فارم کے ذریعے آرڈرز کی رپورٹ دینا ہوگی، کوریئر سروس فراہم کرنے والی مارکیٹ پلیس کو ایس ٹی آر 36 بھی دینا ہوگا۔ ایف بی آر کے مطابق وینڈرز کو سیلز ٹیکس کٹوتی کا سرٹیفکیٹ تفصیلات سمیت دینا ہوگا، سرٹیفکیٹ میں وینڈر کا نام، رجسٹریشن نمبر، اشیاء کی تفصیل لازمی ہوگی۔