پنجاب صاف پانی کمپنی سائوتھ اور نارتھ کابورڈ آف گورنرز کا اجلاس، صاف پانی کمپنیوں کو پنجاب صاف پانی اتھارٹی میں ضم کرنے کی منظوری

ہفتہ 9 اگست 2025 21:50

لاہور (اُردو پوائنٹ اخبارتازہ ترین - اے پی پی۔ 09 اگست2025ء) پنجاب صاف پانی کمپنی سائوتھ کے 75ویں اور نارتھ کے 43ویں بورڈ آف گورنرز اجلاس میں کمپنیوں کو پنجاب صاف پانی اتھارٹی میں ضم کرنے کی منظوری دے دی گئی۔ اجلاس کی صدارت سیکرٹری ہائوسنگ نورالامین مینگل نے کی، اجلاس میں گزشتہ بورڈ اجلاس کے منٹس کی بھی منظوری دی گئی۔ترجمان محکمہ ہائوسنگ کے مطابق انضمام کے بعد تمام اثاثے اتھارٹی کو منتقل کئےجائیں گے اور چیف انجینئر نارتھ اس عمل کی نگرانی کریں گے۔

(جاری ہے)

اجلاس میں 963 واٹر فلٹریشن پلانٹس کی تنصیب کا منصوبہ پیش کیا گیا، جنہیں شمسی توانائی پر منتقل کر کے وسائل کی بچت کی جائے گی،مزید بتایا گیا کہ واٹر فلٹریشن پلانٹس کو چوری اور نقصان سے محفوظ بنانے کے لیے جدید سکاڈاسسٹم نصب کیا جائے گا۔ یہ پلانٹس سکولوں، تھانوں، مدارس، بس اڈوں اور دیگر سرکاری عمارتوں میں لگائے جائیں گے تاکہ سیکیورٹی انتظامات سے فائدہ اٹھایا جا سکے۔وزیر اعلی پنجاب کی ہدایت پر تمام اضلاع میں یکساں اور معیاری سہولیات کی فراہمی کے عمل کو تیزی سے جاری رکھا جا رہا ہے۔