ہرماہ گورنرہائوس میں مشاعرہ منعقد کریں گے۔ گورنرسندھ کا عندیہ

ہفتہ 4 اکتوبر 2025 16:44

کراچی(اُردو پوائنٹ اخبارتازہ ترین - این این آئی۔ 04 اکتوبر2025ء) گورنر سندھ کامران خان ٹیسوری نے عندیہ دیا ہے کہ ہر ماہ گورنر ہائوس میں ساکنان شہر قائد کے زیر انتظام مشاعرہ منعقد کیا جائے گا۔ آج ہم ادب سے دور ہوتے جا رہے ہیں، کتابیں اور اخبارات پڑھنا ترک کر دیا گیا ہے۔ شاعر، ادیب، صحافی حساس ہوتے ہیں، حساسیت ختم ہو تو کرپشن اور ہھر سفاکیت جنم لیتی ہے۔

ڈاکٹر آصف ریاض قدیر کی ادبی خدمات کو خراجِ تحسین پیش کرتاہوں۔ ان خیالات کا اظہار ا نہوں نے ساکنان شہر قائد کے زیر اہتمام ایک شام "ڈاکٹر آصف ریاض قدیر "کے نام کے اعزاز میں گورنر ہائوس میں مشاعرہ سے کیا۔ گورنر سندھ کامران خان ٹیسوری نے مشاعرے میں مہمان خصوصی کی حیثیت سے شرکت کی۔ تقریب میں چیئرمین ایم کیو ایم پاکستان و وفاقی وزیر ڈاکٹر خالد مقبول صدیقی، سینئر مرکزی رہنما ڈاکٹر فاروق ستار، امین الحق و دیگر بھی شریک تھے۔

(جاری ہے)

تقریب میں معروف شعراء میں شامل ڈاکٹر پیر زادہ قاسم، انور شعور، خواجہ رضی حیدر ، جاوید صباء، فاضل جمیلی ، سمیت دیگر شعراء نے اپنے اپنے کلام پیش کرکے حاضرین محفل کے دلوں کو محظوظ کیا۔ گورنر سندھ نے پیر زادہ قاسم کا شعر پڑھا "مگر جب آپ کی سیرت پر جب ساری گفتگو ہولے ، تویہ بھی یاد رکھئے گا کہ ابھی تو ہم نہیں بھولی"۔ تقریب سے خطاب کرتے ہوئے گورنرسندھ نے مزید کہا کہ کراچی میں اردو زبان پر کام کی اشد ضرورت ہے۔

انہوں نے کہا کہ ووٹ لینا ہو تو "مائی کراچی"، کام کرنا ہو تو "وائے کراچی"۔ انہوں نے کہا کہ گورنر ہائوس میں 14 عوامی انیشیٹیوز کا آغاز ہو چکا ہے۔ "امید کی گھنٹی" کے ذریعے عوامی مسائل فوری حل کیے جا رہے ہیں۔ گورنر ہائوس میں جدید آئی ٹی تعلیم بلامعاوضہ فراہم کی جا رہی ہے۔ غریب اور ضرورتمندوں کو لاکھوں کی تعداد میں راش تقسیم کیا جاچکاہے۔ انہوں نے کہا کہ شعراء اور ادب کو زوال پذیر نہیں ہونے دیں گے۔ ڈاکٹر قاسم پیر زاد ہ نے کہا کہ گورنر ہائوس میں آنے والی نسلوں کے لیے بے مثال کام ہو رہا ہے۔ گورنر سندھ ایک دوست پسند اور عوامی شخصیت کے مالک ہیں۔