لاہور کی شاہ عالم مارکیٹ کے پلازے میں آگ لگ گئی

عمارت کی دوسری منزل پر دھواں بھر گیا، واقعے کی اطلاع ملتے ہی ریسکیو ٹیمیں موقع پر پہنچ گئیں

ساجد علی اتوار 10 اگست 2025 16:48

لاہور ( اُردو پوائنٹ اخبارتازہ ترین۔ 10 اگست 2025ء ) صوبہ پنجاب کے دارالحکومت لاہور کی شاہ عالم مارکیٹ کے پلازے میں آگ لگ گئی۔ تفصیلات کے مطابق آتشزگی کا یہ واقعہ لاہور کی معروف شاہ عالم مارکیٹ کے گل پلازہ میں پیش آیا جہاں اچانک آگ بھڑک اٹھی، آگ لگنے سے عمارت کی دوسری منزل پر دھواں بھر گیا، گنجان آباد علاقے اور تنگ گلیوں کے باعث ریسکیو کی گاڑیوں کو پلازے تک پہنچنے میں مشکل ہوئی تاہم اہلکار بروقت جائے وقوعہ پر پہنچ گئے۔

(جاری ہے)

اس حوالے سے ترجمان ریسکیو 1122 کا کہنا ہے کہ گل پلازہ میں آگ لگنے کے واقعے کی اطلاع ملتے ہی ریسکیو ٹیمیں موقع پر پہنچ گئیں اور فائر فائٹرز نے فوری طور پر آگ پر قابو پانے کے لیے کوششوں کا آغاز کردیا، جس کے لیے ناصرف پلازے کے باہر سے آگ بجھانے کی کوششیں کی جارہی ہیں بلکہ ریسکیو اہلکار گل پلازہ کے اندر بھی پہنچنے میں کامیاب ہوگئے تاکہ جلد از جلد آگ پر قابو پایا جاسکے، تاہم ابتدائی طور پر آگ لگنے کی وجہ معلوم نہیں ہوسکی۔