Live Updates

چندے اور امداد کھانے والے دوسروں کو بھی یہی درس دیں گے، وزیر اطلاعات پنجاب

خیبر پختونخواہ میں دہشت گردی، کرپشن، لاقانونیت اور بیڈ گورننس روزانہ دروازے پر دستک دیتی ہے، لیکن وہاں کی حکومت اس پر کوئی بات نہیں کرتی، عظمیٰ بخاری کا مزمل اسلم کے بیان پر ردعمل

فیضان ہاشمی جمعہ 3 اکتوبر 2025 12:58

چندے اور امداد کھانے والے دوسروں کو بھی یہی درس دیں گے، وزیر اطلاعات ..

لاہور (اُردو پوائنٹ اخبارتازہ ترین۔ 03 اکتوبر2025ء)وزیر اطلاعات پنجاب عظمیٰ بخاری نے کہا کہ جن کو چندے اور امداد کھانے کی عادتیں پڑی ہوں وہ دوسروں کو بھی یہی درس دیں گے۔ جس کو دیکھو وہ پنجاب پر انگلی اٹھانے آجاتا ہے۔ حالانکہ اپنے صوبوں کی حالت دیکھنی چاہئے۔ مشیرخزانہ خیبرپختونخواہ مزمل اسلم کے بیان پر ردعمل دیتے ہوئے صوبائی وزیر عظمیٰ بخاری کا کہنا تھا کہ خیبر پختونخواہ میں دہشت گردی، کرپشن، لاقانونیت اور بیڈ گورننس روزانہ دروازے پر دستک دیتی ہے، لیکن وہاں کی حکومت اس پر کوئی بات نہیں کرتی۔

انہوں نے سوال اٹھایا کہ بونیر، صوابی اور سوات میں سیلاب سے ہزاروں افراد متاثر ہوئے، کیا کے پی حکومت نے ان متاثرین کو امداد فراہم کی؟ آپ کے وزیراعلیٰ ہر مہینے وفاق سے فنڈز کیلئے خط لکھتے ہیں اور آپ یہاں شیخ چلی کی طرح شیخیاں بکھیر رہے ہیں، کے پی کابینہ کے دو وزراء نے وزیراعلیٰ خیبرپختونخوا کی کرپشن کی کہانیاں سنا کر استعفے دیئے ہیں۔

(جاری ہے)

صوبائی وزیر نے کہا کہ پنجاب کے 27 اضلاع میں 1857 ٹیمیں سیلاب متاثرین کے سروے میں مصروف ہیں، یہ سروے متاثرہ افراد، کسانوں، مکانات، فصلوں اور مویشیوں کا جائزہ لے رہا ہے، پنجاب میں سیلاب سے 45 لاکھ افراد متاثر ہوئے ہیں اور اتنے بڑے پیمانے پر متاثرین کے سروے ایک ماہ میں مکمل ہو جائیں گے۔ عظمیٰ بخاری نے کہا کہ وزیراعلیٰ پنجاب مریم نواز سیلاب متاثرین کے نام پر قرض یا امداد نہیں مانگیں گی بلکہ خود متاثرہ افراد کے پاس جا کر ان کی مدد کریں گی۔ ان کا مقصد عوامی خدمت ہے، نہ کہ چندہ یا امداد کے لیے ہاتھ پھیلانا۔