جشنِ آزادی کی مناسبت سے ملتان میں شاندار سائیکل ریس کا انعقاد

ریس ہائیکورٹ چوک سے شروع، عیدگاہ پر ختم ہوئی۔ محمد قاسم نے پہلی، محمد اشفاق دوسری اور محمد حذیفہ نے تیسری پوزیشن حاصل کی

پیر 11 اگست 2025 14:05

ملتان(اُردو پوائنٹ اخبارتازہ ترین - این این آئی۔ 11 اگست2025ء)حصولِ آزادی سے تحفظِ آزادی تک کے عنوان سے ضلعی انتظامیہ اور محکمہ سپورٹس کے زیرِاہتمام گرینڈ آزادی سائیکل ریس کا انعقاد کیا گیا۔سائیکل ریس ہائیکورٹ چوک سے شروع ہو کر عیدگاہ چوک پر اختتام پذیر ہوئی۔ ایڈیشنل ڈپٹی کمشنر جنرل محمد سیف نے ریس کا افتتاح کیا، جبکہ ڈسٹرکٹ سپورٹس آفیسر عدنان نعیم، ایس این اے محمد آصف اقبال سمیت ضلعی حکام شریک تھے۔

(جاری ہے)

ریس میں بائیکرز کلب، سول سوسائٹی اور کھلاڑیوں نے بھرپور شرکت کی۔ شرکانے ملی جذبے کے تحت قومی پرچم لہرا کر آغاز کیا۔ مقابلے میں محمد قاسم نے پہلی، محمد اشفاق نے دوسری اور محمد حذیفہ نے تیسری پوزیشن حاصل کی۔ ایڈیشنل ڈپٹی کمشنر جنرل محمد سیف نے فاتحین میں انعامات اور شیلڈز تقسیم کیں۔انہوں نے کہا کہ ضلعی انتظامیہ جشنِ آزادی کے موقع پر مختلف تقریبات منعقد کر رہی ہے، جن میں گرینڈ میوزیکل شو اور آتش بازی کا مظاہرہ بھی شامل ہے۔