آئی سی سی ون ڈے رینکنگ، بابر اعظم دوسری پوزیشن سے بھی محروم

روہت شرما دوسرے نمبر پر ہیں جبکہ ان کے ساتھی کھلاڑی شبمن گل پہلے نمبر پر ہیں

ذیشان مہتاب بدھ 13 اگست 2025 13:43

آئی سی سی ون ڈے رینکنگ، بابر اعظم دوسری پوزیشن سے بھی محروم

دبئی (اردو پوائنٹ تازہ ترین اخبار ۔ 13 اگست 2025ء ) پاکستان کے ٹاپ آرڈر بلے باز بابر اعظم ویسٹ انڈیز کے خلاف حالیہ سیریز میں مایوس کن کارکردگی کے بعد آئی سی سی کی تازہ ترین ون ڈے رینکنگ میں مزید تنزلی کا شکار ہوگئے، انہوں نے تین میچوں میں 18.66 کی اوسط سے صرف 56 رنز بنائے۔

بابر اعظم جو اس سیریز سے قبل دوسرے نمبر پر تھے، 751 ریٹنگ پوائنٹس کے ساتھ تیسرے نمبر پر آ گئے ہیں۔

انہیں ہندوستان کے ون ڈے کپتان روہت شرما نے پیچھے چھوڑ دیا ہے جبکہ شبمن گل عالمی درجہ بندی میں پہلے نمبر پر برقرار ہیں۔

دیگر پاکستانی کھلاڑیوں میں ون ڈے ٹیم کے کپتان محمد رضوان بھی 602 پوائنٹس کے ساتھ 21 ویں سے 22 ویں نمبر پر آگئے ہیں۔

اوپننگ بلے باز فخر زمان جو انجری کے باعث ویسٹ انڈیز کے ون ڈے میں نہیں کھیل سکے تھے وہ 4 درجے گر کر 590 پوائنٹس کے ساتھ 27 ویں نمبر پر ہیں۔

(جاری ہے)

امام الحق اور آغا سلمان کی رینکنگ میں بالترتیب 37 ویں اور 41 ویں نمبر پر کمی آئی۔

پاکستان کے بلے بازوں میں سب سے زیادہ کمی کا سامنا صائم ایوب کو ہوا جو نو درجے گر کر 46 ویں نمبر پر آ گئے۔ دریں اثناء اوپننگ بلے باز عبداللہ شفیق 7 درجے بہتری کے ساتھ 428 پوائنٹس کے ساتھ 90 ویں نمبر پر پہنچ گئے۔

آئی سی سی ون ڈے باؤلرز کی رینکنگ میں بائیں ہاتھ کے تیز گیند باز شاہین آفریدی تین میچوں میں صرف چار وکٹیں لینے کے بعد 599 پوائنٹس کے ساتھ 13ویں نمبر پر آگئے۔

حارث رؤف تین درجے تنزلی کے ساتھ 27 ویں جبکہ نسیم شاہ 493 پوائنٹس کے ساتھ ایک درجہ تنزلی کے ساتھ 43 ویں نمبر پر ہیں۔ سپنر ابرار احمد تین درجے چڑھ کر 54 ویں، محمد نواز 64 ویں اور محمد وسیم جونیئر چار درجے تنزلی کے ساتھ 71 ویں نمبر پر پہنچ گئے۔

سری لنکا کے مہیش تھیکشنا دنیا کے نمبر ایک ون ڈے بولر کے طور پر غلبہ برقرار رکھے ہوئے ہیں، اس کے بعد ہندوستان کے کلدیپ یادیو دوسرے اور جنوبی افریقہ کے کیشو مہاراج تیسرے نمبر پر ہیں۔