آئی سی سی ٹی ٹونٹی رینکنگ میں پاکستانی باؤلرز کی ترقی، بیٹرز کی تنزلی

فاسٹ بولر حارث رؤف 575 پوائنٹس کے ساتھ دو درجے چھلانگ لگا کر 24 ویں نمبر پر پہنچ گئے

ذیشان مہتاب بدھ 13 اگست 2025 15:57

آئی سی سی ٹی ٹونٹی رینکنگ میں پاکستانی باؤلرز کی ترقی، بیٹرز کی تنزلی

دبئی (اردو پوائنٹ تازہ ترین اخبار ۔ 13 اگست 2025ء ) پاکستان کے باؤلرز نے تازہ ترین آئی سی سی ٹی ٹونٹی رینکنگ میں نمایاں کامیابیاں حاصل کی ہیں جب کہ ملک کے بلے بازوں میں تنزلی ہوئی ہے۔

فاسٹ بولر حارث رؤف دو درجے چھلانگ لگا کر 575 پوائنٹس کے ساتھ 24 ویں نمبر پر پہنچ گئے جبکہ عباس آفریدی ایک درجہ ترقی کر کے 572 پوائنٹس کے ساتھ 26 ویں نمبر پر آ گئے۔

سپنر سفیان مقیم اور بائیں ہاتھ کے تیز گیند باز شاہین آفریدی بھی 542 اور 541 پوائنٹس کے ساتھ بالترتیب 33 ویں اور 34 ویں نمبر پر پہنچ گئے۔

تاہم محمد نواز اور ابرار احمد کی اسپن جوڑی بالترتیب 2 اور ایک درجے کی تنزلی کے بعد 58 ویں اور 61 ویں جبکہ شاداب خان ایک مقام گر کر 73 ویں نمبر پر پہنچ گئے۔

رینکنگ میں ٹاپ پر نیوزی لینڈ کے جیکب ڈفی بدستور پہلے نمبر پر ٹی ٹونٹی بولر ہیں جس کے بعد انگلینڈ کے عادل راشد دوسرے اور ویسٹ انڈیز کے عقیل حسین تیسرے نمبر پر ہیں۔

(جاری ہے)

بیٹنگ کے محاذ پر پاکستان کے اسٹارز بابر اعظم اور محمد رضوان جو 2024ء سے ٹی ٹونٹی ایکشن سے باہر ہیں، ایک ایک مقام گر کر 18ویں اور 20ویں نمبر پر پہنچ گئے۔

مڈل آرڈر بلے باز حسن نواز دو درجے تنزلی کے ساتھ 32 ویں جبکہ صائم ایوب 559 پوائنٹس کے ساتھ 38 ویں نمبر پر آگئے۔

دیگر قابل ذکر کمیوں میں اوپنر صاحبزادہ فرحان شامل ہیں جو 64 ویں نمبر پر، ٹی 20 آئی کے کپتان سلمان علی آغا 77 ویں بائیں ہاتھ کے بلے باز فخر زمان 79 ویں اور وکٹ کیپر بلے باز محمد حارث دو درجے گر کر 88 ویں نمبر پر ہیں۔

ہندوستان کے ابھیشیک شرما T20I بیٹنگ رینکنگ میں بدستور سرفہرست ہیں۔

دوسری اور تیسری پوزیشن میں تبدیلیوں سے آسٹریلیا کے ٹریوس ہیڈ دو درجے گر کر چوتھے نمبر پر آگئے جس سے ہندوستان کے تلک ورما دوسرے اور انگلینڈ کے فل سالٹ تیسرے نمبر پر پہنچ گئے۔